काठमाडौं । कोरोना भाइरसको माहामारीको कारण सिंगो देश लकडाउन भएको सन्दर्भमा बीमा समितिले आज एक निर्देशन जारी गरी सबै बीमा कम्पनीहरुलाई डिजिटल कार्यालयमार्फत बीमा कारोबार सञ्चालन गर्न निर्देशन दिएको छ । अर्थ मन्त्रालयको निर्देशनपछि बीमा समितिले जारी गरेको निर्देशनमा जीवन बीमा शुल्क संकलन गर्ने कार्य स्थगित गर्न भनिएको छ । साथै परिस्थिति सामान्य भएपछि बिना ब्याज बीमा शुल्क संकलन गर्ने कार्य मिलाउन निर्देशन दिएको छ ।
त्यसैगरी, निर्जिवन बीमा कम्पनीहरुको हकमा इमेलमार्फत बीमा नविकरण गर्ने व्यवस्था मिलाउन निर्देशन दिइएको छ । त्यस्तै, बीमा अभिकर्ता र सर्भेयरको लाईसेन्स नविकरण चैत्र मसान्तभित्र नविल बैंकको खातामा रकम जम्मा गरी नविकरण गराउँदा जरिवना नलाग्ने व्यवस्था गरिएको छ ।
त्यस्तै, बीमा समितिले बीमा कम्पनीहरुलाई अनलाईनबाटै दावी भुक्तानीको निवेदन लिने व्यवस्था गर्न निर्देशन दिएको छ । साथै अनलाईनबाटै यथेष्ट प्रमाण मागी आवश्यक प्रक्रिया पूरा गर्न निर्देशन दिएको छ । त्यस्तै जीवनको अवधी पूरा भएका बीमितको हकमा त्यस्तो रकम बीमितको खातामा जम्मा गरिदने व्यवस्था मिलाउन समेत निर्देशन दिइएको छ ।
बीमा समितिको आज बसेको बैठकपछि कार्यकारी निर्देशक राजुरमण पौडेलद्वारा जारी निर्देशनमा बीमितहरुको हिकका लागि न्यूनतम सेवा प्रवाह गर्न तथा त्यस्ता सेवाहरु सार्वजनिक सञ्चार माध्यमबाट प्रकाशन प्रशारण गर्न समेत निर्देशन दिइएका छ ।
