काठमाडौं । बिहिवार पुँजि बजारका लगानीकर्ता, नेप्से तथा सेबोनका बीचमा कोरोनाबाट पुँजि बजारलाई कसरी जोगाउने भन्ने सम्बन्धमा गहन छलफल भयो । विभिन्न कोणबाट भएको छलफलमा चैत्र महिनाभित्र स्टक एक्सचेन्जमा कारोबार स्थगन गर्ने सहमति भएको चर्चा बाहिर आएको छ ।
बिहिवार भएको छलफल अनुसार कारोबार स्थगन गर्दा शेयर कारोबार मात्रै गरेर जीवन गुजारा गर्ने लगानीकर्ता कसरी बाँच्ने ? भन्ने प्रश्न उठेको छ । सो प्रश्न उठे लगत्तै पुनः नयाँ उपाय निकालियो, ब्रोकर कम्पनीले समस्यामा परेका लगानीकर्तालाई उनीहरुकै शेयर धितोमा एक लाख रुपैयाँदेखि डेढ लाख रुपैयाँसम्म ऋण दिने । बिहिवारको बैठकमा सहभागी एक सदस्यका अनुसार उक्त विषयमा सहमति भने भइसकेको छैन । तर, लगानीकर्ताको गर्जो टार्ने हदसम्म जाँदा त्यहाँसम्म गर्नुपर्ने सुझाव अघि सारिएको हो ।
बिहिवारको छलफलमा भएको सहमति अनुसार कम्तीमा एक साताको लागि स्टक एक्सचेन्जमा कारोबार स्थगन गरिनेछ । त्यसपछिको अधिकार भने बोर्डसँग नरहेको हुँदा लगानीकर्ताहरुले उपल्लो निकायमा पहल गरेमा चैत्र महिनाभरि नै कारोबार स्थगन गर्न धितोपत्र बोर्ड सकारात्मक रहेको जनाइएको छ । बोर्डले भने सो सम्बन्धमा कुनै औपचारिक निर्णय गरेको छैन । यस्तो सहमति भएको कुरा बाहिर आउने वित्तिकै कारोबार बन्द हुने समयमा नेप्सेमा पुनः मूल्यबृद्धि भएको छ ।
