अपडेटः
अचेत अवस्थामा रहेकी पूर्व सचिव अर्जुन कुमार कार्कीकी श्रीमती मुना कार्की अधिकारीको स्टार अस्पतालमा उपचारको क्रममा मृत्यु भएको छ । प्रहरीले नाडीमा पल्स चलेको सुनेपछि तत्कालै अस्पताल पुर्याएकोमा उनको उपचारको क्रममा मृत्यु भएको हो ।
……………………………………………………………………………………………………………….
काठमाडौं । पूर्व सचिव अर्जुन कार्कीको सानेपास्थित घरमा हत्याकाण्ड मच्चिएको छ । उनकी श्रीमतीमाथि सांघातिक हमला भई अचेत अवस्थामा भेटिएकी छिन् भने घरमा काम गर्ने कामदार मृत अवस्थामा फेला परेका छन् ।
घटना रहस्यमय छ । पूर्व सचिव कार्की विहान पशुपतिको मन्दिर दर्शन गर्न गएको समयमा सो घटना भएको बताइएको छ । श्रीमतीको शरीरभरि रगत लतपतिएको छ, कामदार दाङ्का बिजय चौधरी भने मृत अवस्थामा भेटिएका हुन् ।
सानेपास्थित प्रहरी कार्यालय नजिकै रहेको कार्कीको घरमा आज विहान सो हत्याकाण्ड घटेको हो । चौधरीको शरीरमा कुनै चोट पटक नभएको जनाइएको छ । यद्यपि घटनाको सम्बन्धमा प्रहरीले अनुसन्धान गरिरहेको छ ।
कार्कीमाथि भुकम्पमा खरिद गरिएको त्रिपाल काण्डमा भ्रष्टाचारको आरोप समेत लागेको थियो । कार्कीले पाँच वर्षअघि झण्डै पाँच करोड रुपैयाँ खर्च गरेर सानेपामा नयाँ घर बनाएका थिए । उनले घरको मूल गेटमै सिसी क्यामेरा राख्ने गरेका थिए । पूर्व सचिव कार्कीका एक छोरा र दुई छोरी रहेका छन् ।
