काठमाडौं । महालक्ष्मी विकास बैंकले चालु आर्थिक वर्षको दोस्रो त्रैमासको वित्तीय विवरण प्रकाशन गरेको छ । बैंकले यस अवधिस अधिकांश सूचकमा सुधार गरेको देखिन्छ ।
यस अवधिसम्ममा बैंकले ३० करोड ५० लाख रुपैयाँ खुद नाफा आर्जन गरेको छ । जुन गत आर्थिक वर्षको सोही अवधिको तुलनामा ५४ प्रतिशत बढी हो । गत आर्थिक वर्षको सोही अवधिमा बैंकले १९ करोड ७६ लाख रुपैयाँ मात्र नाफा आर्जन गरेको थियो ।
३ अर्ब ७ करोड २० लाख रुपैयाँ चुक्ता पूँजी रहेको यस बैंकको जगेडा कोषमा १ अर्ब ४० करोड ८१ लाख रुपैयाँ सञ्चित छ । पुस मसान्तसम्ममा २१ करोड १३ लाख रुपैयाँ वितरण योग्य मुनाफा आर्जन गरेको छ ।
चालु आर्थिक वर्षको पुस मसान्तसम्ममा बैंकले ८० करोड ४१ हजार रुपैयाँ खुद ब्याज आम्दानी गरेको छ । गत आर्थिक वर्षको सोही अवधिको तुलनामा १७ करोड ४२ लाख रुपैयाँ बढी हो । समीक्षा अवधिमा बैंकको सञ्चालन मुनाफा १६ करोड ५० लाख रुपैयाँ बढेर ४२ करोड ७० लाख पुगेको छ ।
यस अवधिसम्ममा बैंकले ३५ अर्ब ७ करोड रुपैयाँ निक्षेप सङ्कलन गरी २९ अर्ब १८ करोड रुपैयाँ कर्जा लगानी गरेको छ ।
बैंकको प्रतिशेयर आम्दानी १९ रुपैयाँ ८६ पैसा कायम भएको छ । जुन गत आर्थिक वर्षको सोही अवधिको तुलनामा ५ रुपैयाँ ९६ पैसा बढी हो । प्रतिशेयर नेटवर्थ १५२ रुपैयाँ ७६ पैसा कायम भएको छ । मूल्य आम्दानी अनुपात ९.७७ गुणा कायम भएको छ ।
