काठमाडौं । बीमाको महत्व बुढेसकालमा झनै बढ्ने गर्दछ । बिस्तारै मानिसले बीमाको महत्व बुझ्दै जाँदा बीमा गराउने क्रम पनि बढ्दै गएको छ । विवाहको बार्षिकोत्सव तथा जन्मोत्सवमा समेत लाखौं रुपैयाँका बीमा पोलिसी आफन्तलाई दिने क्रम पनि बढेको छ । यसैक्रममा जीवनको आधा बसन्त पार गरिसकेका एक व्यक्तिले ३९ औं वैवाहिक बार्षिकोत्सवमा ५० लाखमा जीवन बीमा पोलिसी आफ्ना जीवनसँगीलाई उपहार दिएका छन् ।
काठमाडौंको पुरानोबानेश्वर, भिमसेनगोला निवासी यादव प्रसाद खकुरेलले विवाह भएको ३९ औं वर्षिकोत्सव आफ्नी ५८ बर्षिय जीवनसँगी अनुराधा सिलवाललाई माघ १६ गते ५० लाखको बीमा पोलिसी हस्तान्तरण गरेका हुन् । उक्त दम्पत्तिको विवाह २०३७ सालमा विवाह भएको थियो ।
घरभाडाबाट आम्दानी गर्ने खकुरेलले जन्मदिनको अवसरमा पहिलो बीमा शुल्क पाँच लाख ८९ हजार रुपैयाँ बीमा शुल्क तिरेर युनियन लाईफको एनुएल मनीब्याक बीमा पोलिसी खरिद गरी वैवाहिक वार्षिकोत्सव मनाएका हुन् । युनियन लाईफमा १२ वर्षे अवधीको बीमा सिनियर एजेन्सी म्यानेजर अम्बिका गौतमले गराएकी हुन् । समाजसेवामा सक्रिय खकुरेलको काठमाडौंमै रहेको घरको भाडा लगायतको आम्दानी बचत तथा जोखिम दुवैको लागि बीमा गर्न परामर्श दिई बीमा गराएको बताईन् ।
