कैलाली । एनआरएन लघुवित्त वित्तिय संस्थाले अर्काे मर्जर सम्झौता गरेको छ । पहिलो मर्जर सफल गरेको छोटो समयमै माघ १ गते बुधबार एनआरएनले सुदूरपश्चिमको लम्कीचूहा न.पा. मा रहेको किसान माइक्रोफाइनान्स र काभ्रेपलान्चोक जिल्लाको भकुन्डेबेसीमा रहेको दिव्य लघुवित्तसँग दोश्रो मर्जरका लागि प्रारम्भिक सम्झौता गरेको जनाएको छ ।
सम्झौतामा किसान माइक्रोफाइनान्स तर्फबाट सञ्चालक समितिका अध्यक्ष नेत्रप्रसाद जोशी, एनआरएन लघुवित्तका तर्फबाट मर्जर समिति संयोजक शम्भु घिमिरे र दिव्य लघुवित्तका तर्फबाट मर्जर समिति संयोजक महेश बस्नेतले हस्ताक्षर गरिसकेका छन् भने सम्झौताको विबरण राष्ट्र बैंकमा दर्ता समेत गरिसकेको संस्थाले जनाएको छ ।
संस्थाको अध्यक्ष तथा प्रमुख कार्यकारी अधिकृत हालको एनआरएन लघुवित्त वित्तिय संस्था लि बाटै रहने सहमति भएकोछ भने संस्थाको नाम एकिकृत साधारण सभाले परिवर्तन नगरेसम्म एनआरएन लघुवित्त वित्तिय संस्था नै रहने छ । चैत्र भित्र नै एकिकृत कारोबार गर्ने गरि मर्जरको कार्य तीव्र गतिमा हुने संस्थाले जनाएको छ । त्यस्तै, संस्थाको सेयर अनुपात मर्जरको दौरानमै गरिने भएको छ ।
मर्जर पश्चात संस्था ५२ करोड पूजी सहित १३० भन्दा बढि शाखाबाट १ लाख सदस्यमा सात वटै प्रदेशमा उपस्थिती जनाउन सफल हुने एनआरएन लघुवित्तले स्थापनाको १ बर्ष छोटो अवधीमै ६ वटा लघुवित्त मर्ज गरि तत्कालै हकप्रद सेयर तथा एफपीओ जारि गरि १ अर्ब पूजी सहितको एक राष्ट्रियस्तरको सफल तथा शसक्त लघुवित्तका रूपमा स्थापित हुने लक्ष्य लिएको संस्थाका प्रमुख कार्यकारी अधिकृत इन्द्र कुमार शाहले बताए ।
