काठमाडौं । राजधानीको ललितपुरस्थित छम्पीमा रहेको एक विद्यालयले विद्यार्थी लिएर स्कूल फर्कने क्रममा आफ्नै विद्यार्थी किचेर मृत्यु भएको छ । छम्पीमा रहेको होलिटेम्पल विद्यालयको बसले एककेजीमा अध्ययनरत विद्यार्थीलाई किचेको हो । घटनास्थलमै विद्यार्थीको मृत्यु भएको ललितपुर प्रहरीले जनाएको छ ।
घटनापछि एकान्तकुरना–भैसेपाटी छम्पी सडक अबरुद्ध भएको महानगरीय ट्राफिक प्रहरी महाशाखाले जनाएको छ । विद्यालय जान बस चढेका गोदावरी नगरपालिका वडा. नं ९ छम्पीका आठ बर्षिय नविन घिमिरेलाई बसले किचेपछि मृत्यु भएको स्थानीय प्रत्यक्षदर्शीले बताए । बिमल बिष्टले सञ्चालन गरेको सो विद्यालयको विद्यार्थी ओसार्ने गाडी बा२ख ५००९ नम्बरको बसमा चढेका घिमिरे केही पर पुगेपछि बसको ढोकाबाट झर्न पुगेका थिए ।
विद्यालय पठाएको बालक केही पर नपुग्ने सोही विद्यालयको बसले कुल्चेर मृत्यु भएपछि बालकका अभिभावक बेहोस् भएका छन् । प्रहरी चौकी नजिकै होटल व्यवसाय गर्दै आएका उनीहरुले होटल अगाडिबाटै बच्चालाई विद्यालयले भाडामा लिएको बस चढाएर पठाएका थिए । विद्यालयका बालबालिकाले खचाखच भरिएको बसमा सह–चालक समेत नहुँदा ति बालक जमिनमा खस्न पुगेका थिए । चालकले थाहा नपाउँदा पछाडिको चक्काले कुल्चँदा उनको मृत्यु भएको हो ।
घटनालगत्तै उक्त स्थानमा पुगेका ‘देवेन्द्र’ नाम गरेका लेखा अधिकृतले कुटाई खाएका छन् भने बस तोडफोड भएको छ । आक्रोसित भिडले प्रिन्सिपललाई कारवाही गर्नुपर्ने माग राख्दै विरोध गरेका छन् । सर्वसधारणले लाश उठाउन दिएका छैनन् । सार्वजनिक बस भाडामा लिएर विद्यार्थी बोकिएको थियो । उक्त घटनाको बीमा दावी सम्बन्धीत कम्पनीमा पर्ने देखिएको छ ।
