काठमाडौं । बैंक अफ काठमान्डूको २४ औं वार्षिक साधारण सभा असोज ३० गते हुने भएको छ । सभा एलिस रिसेप्सन, गैह्रीधारा काठमाडौंमा बिहान १० बजे सुरु हुने जनाएको छ । असोज ७ गते बसेको संचालक समितिको बैठकले उक्त सभाको मिति तय गरेको हो ।
साधारण सभा प्रयोजनका लागि बैंकले असोज १६ देखि ३० गतेसम्म बुक क्लोज गर्नेछ । यसर्थ, असोज १५ गतेसम्म कायम सेयरधनीले बैंकले वितरण गर्ने लाभांश पाउनेछन् ।
सभामा बैंकले १७ प्रतिशत लाभांश वितरण गर्ने प्रस्ताव पेश गर्दैछ । बैंकले गत वर्षको कमाईबाट ११ प्रतिशत नगद लाभांश र ६ प्रतिशत बोनस वितरण गर्दैछ । बोनसपछि चुक्ता पुँजी वृद्धि हुने भएकाले सोही बमोजिम नियमावली संशोधन गर्ने एजेन्डा रहेको छ ।
त्यस्तै, सभामा आर्थिक वर्ष २०७५/७६ को सञ्चालक समितिको प्रतिवेदन, वासलात, नाफा नोक्सान लगायतका विषयमा छलफल गर्ने प्रस्ताव पनि छ । यस्तै, आर्थिक वर्ष २०७६–७७ का लागि लेखापरीक्षक नियुक्ति र पारिश्रमिक निर्धारण गर्ने अर्को एजेन्डा पनि छ ।
हाल बैंक अफ काठमान्डूको चुक्ता पुँजी ८ अर्ब ६ करोड ३१ लाख १ हजार रुपैयाँ रहेको छ । ६ प्रतिशत बोनस वितरणपछि चुक्ता पुँजी ८ अर्ब ५४ करोड ६८ लाख ८७ हजार ६० रुपैयाँ पुग्नेछ ।
