काठमाडौं । देशको संघीय राजधानी काठमाडौंस्थित दरवारमार्गकै एटिएम बुथबाट रकम चोरिन थालेपछि अन्यत्रको अवस्था के होला ? आइतबार उज्यालो नहुँदै रकम चोरीमा संलग्न प्रहरीले पाँच जना चिनियाँलाई प्रहरीले रंगेहात पक्राउ गरेको छ ।
पाँच जना चिनियाँ टोलीले एउटा बाणिज्य बैंकको एटिएम प्रयोग गरेर नबिल बैंकको एटिएमबाट रकम निकाल्दै गरेको अवस्थामा पक्राउ गरेको हो । उनीहरुको साथबाट ठूलो रकम समेत बरामद भएकोले अन्य थप एटिएमहरुबाट समेत रकम चोरी भएको अनुमान गरिएको छ । शंकास्पद रुपमा रकम निकाल्दै गरेको देखेपछि प्रहरीले नियन्त्रणमा लिई सोधपुछ गर्दा ठूलो रकम फेला परेपछि थप रहस्य खुलेको थियो ।
सो गिरोहको साथबाट एक करोड ३६ लाखभन्दा बढि नगद समेत फेला परेको प्रहरीले जनाएको छ । नेपालका एटिएमहरु असुरक्षित हुँदा समय समयमा यस्ता घटना हुने गरेका छन् । कसको कुन खाताबाट रकम निकालियो भन्ने विषयमा प्रहरीले अनुसन्धान सुरु गरेको छ ।
