नेपालगञ्ज । बैंक तथा वित्तीय संस्थामा सर्वसधारणले जम्मा गरेको निक्षेपमा बैंककै अधिकृतको आँखा लाग्न थालेपछि सर्वसधारणको निक्षेप जोखिममा पर्ने भयो । सिटिजन्स बैंक नेपालगञ्ज शाखामा यस्तै एउटा घटना भएका छ ।
नक्कली सुन धितोमा राखेर करोडौं रुपैयाँ ऋण प्रवाह गरी बैंकलाई डुबाएको अभियोग लागेका प्रबन्धक विवेक स्वाँरलाई हृदयघात भएको छ । हृदयाघातका कारण गएराति नै उनको मृत्यु भएको छ । हृदयघात भएपछि राति नै भेरी अस्पताल ल्याइएका स्वाँरको उपचारका क्रममा मृत्यु भएको अस्पतालले जनाएको छ ।
अधिकृत स्वाँरले बैंकिङ कसुरअन्तर्गत मुद्दा खेप्दै आएका थिए । प्रहरीले बैंककै सिफारिसको आधारमा पक्राउ गरी अदालतमा मुद्दा दायर गरेको थियो । उनी गत साउन ८ गते २५ लाख धरौटीमा छुटेका थिए ।
सिटिजन्स बैंकमा नक्कली सुन धितो राखेर बैंकलाई करोडौं ठगी गरेको अभियोग लागेपछि स्वाँर मानसिक तनावमा थिए । मानसिक तनावमा रहेका स्वाँरको सो नक्कली सुन प्रकरणमा हृदयघात भएर ज्यान गएको बताइएको छ ।
कार्यालयबाट साँझ ६ बजे घर फर्केका स्वाँर आइतबार अबेर एक्कासी बिरामी भएपछि अस्पताल भर्ना गरिएको थियो । घटनापछि बैंकमा खैलाबैला मच्चिएका छ ।
