अपडेटः सञ्चारकर्मी रवि लामिछानेलाई पक्राउ गर्ने प्रहरी विरुद्ध नै कीर्ते मुद्दा दर्ता गर्न टेकु पुगेकी लामिछानेकी श्रीमती निकिता पौडेललाई काठमाडौं प्रहरी परिसरले उजुरी दर्ता नै नगरी फर्काएको छ । उजुरी दर्ता गर्न भन्दै झण्डै दुई घण्टा काठमाडौं प्रहरी परिसरमा टेकुमा बिताएका उनीहरु हालै त्यहाँबाट फर्केका छन् ।
…………………………………….
रविलाई पक्राउ गर्ने चितवनका एसपीविरुद्ध कीर्ते मुद्दा दर्ता हुँदै
काठमाडौं । चर्चित सञ्चारकर्मी रवि लामिछाने पक्राउका विरुद्धमा चितवनमा दैनिकजसो विशाल प्रदर्शन भइरहेको छ । ठूलो जमात रवि लामिछानेलाई नियोजित रुपमा फसाउने षडयन्त्र रचिएको भन्दै विरोधमा उत्रिएका बेला पक्राउ गर्न मुख्य भूमिका खेल्ने चितवन प्रहरीका विरुद्धमा महानगरीय प्रहरी परिसर काठमाडौंमा उजुरी दर्ता हुँदैछ ।
श्रीमती निकिता पौडेल (लामिछाने)ले रवि लामिछानेलाई पक्राउ गर्ने कार्यमा संलग्न चितवन प्रहरी प्रमुख एसपी दान बहादुर मल्लसहित तीन जनाविरुद्धमा उजुरी दर्ता गर्न लागेकी हुन् । उनी टेकुस्थित प्रहरी कार्यालयमा पुगिसकेकी छिन् । तर, त्यहाँ कार्यालय प्रमुख नभएको भन्दै दर्ता गर्न ढिलाई भएको छ । अन्य दुई जनामा जनआस्था साप्ताहिकका पत्रकार किशोर श्रेष्ठ तथा नेपाल आज अनलाईनका सम्पादक संकेत कोइराला छन् । नेपाल आज भन्ने अनलाईनले शालिकराम पुडासैनीले आत्महत्या गर्नुअघिको भिडियो सार्वजनिक गरेका थिए ।
आफ्ना वकिलसहित टेकु पुगेकी निकिताले मुलुकी फौजदारी सहिंता–२०७४ को दफा २७६ र २७७ मुलुकी अपराध सहिंता र सरकारी विद्युतीय अभिलेख किर्ते सम्बन्धी कानूनको बुँदामा टेकेर उजुरी दर्ता गर्न लागेकी हुन ।
