काठमाडौं । सिटिजन लाइफ इन्स्योरेन्स कम्पनीले आर्थिक वर्ष २०७५/७६ को चौथो त्रैमासको वित्तीय विवरण सार्वजनिक गरेको छ । इन्स्योरेन्सले उक्त अवधिमा एक अर्ब १६ करोड ५१ लाख ६१ हजार रुपैयाँ कुल बीमा शुल्क आर्जन गर्न सफल भएको छ । गत आवको सोही अवधिको तुलनामा कम्पनीको कुल बीमा शुल्क आर्जन एक सय ९० प्रतिशतले बृद्धि भएको छ ।
अघिल्लो आवको सोही अवधिमा कम्पनीले ४० करोड २० लाख ५० हजार रुपैयाँ कुल बीमा शुल्क आर्जन गर्न सफल भएको थियो । एक अर्ब ७५ करोड रुपैयाँ चुक्ता पूँजी रहेको कम्पनीको २५ करोड १० लाख ६३ हजार रुपैयाँ जगेडा कोषमा जम्मा रहेको छ ।
आर्थिक वर्ष २०७५/७६ को चौथो त्रैमासको अवधिमा कम्पनीको जीवन बीमा कोषमा ६६ करोड ५६ लाख २२ हजार रुपैयाँ रहेको छ । गत आवको सोही अवधिमा कम्पनीको जीवन बीमा कोषमा ११ करोड ८१ लख ५७ हजार रुपैयाँ रहेको थियो ।
आर्थिक वर्ष २०७५/७६ को चौथो त्रैमासको अवधिसम्म आइपुग्दा कम्पनीले १ अर्ब १२ करोड ८४ लाखख ८६ हजार रुपैयाँ खुद बीमा शुल्क आर्जन गरेको छ । गत आवको सोही अवधिको तुलनामा यो २१३ प्रतिशतले बढी हो । गत आवको सोही अवधिमा कम्पनीले ३६ करोड ५ लाख ९५ हजार रुपैयाँ खुद बीमा शुल्क आर्जन गरेको थियो ।
चौथो त्रैमासको अवधिमा कम्पनीमा ४८ हजार ७ सय ८६ वटा बीमालेख जारी भएका छन् । यो १२ प्रतिशतले घटी हो । गत आवको सोही अवधिमा कम्पनीमा ५५ हजार ५ सय ४० वटा बीमालेख जारी भएका थिए । यद्यपि उक्त संख्या वित्तिय विवरणमा देखिए पनि म्यादी जीवन बीमाको संख्याका कारण गत वर्षको संख्या धेरै भएको र यस वर्ष म्यादी जीवन बीमा पुलतर्फ सरेकाले वित्तिय विवरणमा समावेश हुन नसकेको कम्पनीले जनाएको छ ।
त्यस्तै आर्थिक वर्ष २०७५/७६ को चौथो त्रैमासको अवधिमा कम्पनीले ५० करोड ४ लाख ६५ हजार रुपैयाँ कुल दावी भुक्तानी गरेको छ । गत आवको सोही अवधिको तुलनामा यो ७२० प्रतिशतले बढी हो । गत आवको सोही अवधिमा कम्पनीले ६१ ह्जार ५८ लाख रुपैयाँ कुल दावी भुक्तानी गरेको थियो ।
आर्थिक वर्ष २०७५/७६ को चौथो त्रैमासको अवधिमा कम्पनीले १७ करोड ४ लाख ८७ हजार रुपैयाँ खुद नाफा कमाउन सफल भएको छ । जीवन बीमा कम्पनीहरुको मुनाफा लगायतको वित्तिय विवरणहरु लेखापरिक्षणको क्रममा बीमांकीय मूल्याङ्कनको क्रममा फेरबदल हुनसक्छ ।
