काठमाडौं । तलब वृद्धिमा सहमति भएसँगै बोइङ कर्मचारीहरुले थालेको आन्दोलन टुंगिएको छ। विश्वकै ठूलो विमान निर्माता कम्पनी बोइङका कर्मचारीले ७ हप्ता लामो आन्दोलन व्यवस्थापन पक्षसँगको सहमतिमा टुंग्याएका हुन्।
कम्पनी व्यवस्थापन र आन्दोलनरत कर्मचारीबीच ३८ प्रतिशतले तलब बढाउने सहमति भएको छ। यो ४ वर्षे सहमति हो। यसअघि कम्पनीको ३५ प्रतिशतले तलब बढाउने प्रस्ताव आन्दोलित कर्मचारीले मतदानमार्फत अस्वीकृत गरेका थिए। पछिल्लो ३८ प्रतिशतले तलब बढाउने कम्पनीको प्रस्ताव पनि कर्मचारीहरुले मतदानमार्फत स्वीकृत गरेका हुन्।
यसअघि बोइङका कर्मचारीहरुले गत सेप्टेम्बर १४ देखि तलब वृद्धिको माग गर्दै आन्दोलन गरिरहेका थिए। कर्मचारी युनियनमा आबद्ध करिब ३३ हजार कर्मचारीले काम राकेका थिए। उनीहरुको आन्दोलनले कम्पनीको ७३७ म्याक्स, ७६७ र ७७७ विमान उत्पादन प्रभावित बनेको थियो।
यसअघि पनि कम्पनीले गरेको ३० प्रतिशत तलब वृद्धिको प्रस्ताव कर्मचारीहरुले अस्वीकृत गरेका थिए। उनीहरुले यति वृद्धि दैनिक जीवनयापन सहज नहुने बताएका थिए।
कर्मचारीहरुले ४० प्रतिशत तलब वृद्धिको माग अघि सार्नुका साथै पेन्सनको व्यवस्था गर्नुपर्ने माग गरेका थिए। –एजेन्सी
