काठमाडौं । विश्वभरका धनी व्यक्तिहरुमा निजी जेटबाट यात्रा गर्ने चलन बढ्दै गएको छ । विश्वव्यापी निजी उड्डयन क्षेत्र विशेषगरी संयुक्त अरब इमिरेट्स (यूएई)मा सन् २०२० देखि तीव्र गतिमा वृद्धि भएको छ। दुबईमा पनि जेटमा पार्टी गर्ने चलन देखिएको छ । यसलाई प्रवर्द्धन गर्न दुबईमा एउटा अनौठो ९एच–फाइभ पार्टी जेट रहेको हो। यो पार्टी जेट लक्जरी होटल ब्रान्ड फाइभले सन् २०२३ मा लन्च गरेको थियो। यो विमान एससीजे टुट्वान्दी कम्लक्ससँगको साझेदारीमा एयरबसको नयाँ व्यापारिक जेट हो।
सीएनएन रिपोर्टका अनुसार निजी विमानहरु सामान्यतया कर्पोरेट बेज रङमा सजाउन सकिन्छ तर यो जेटले ग्राहकलाई अझ राम्रो सुविधा प्रदान गर्नमा विश्वास गर्छ। यो भित्रबाट लक्जरी होटलजस्तै छ। यसमा इलेक्ट्रो क्रोमेटिक विन्डो शेड, दुई ५५ इन्च टीभी स्क्रिन, क्युरेट गरिएको प्लेलिस्टसहितको इन–फ्लाइट साउन्ड सिस्टम, स्मार्ट टेक्नोलोजी टचस्क्रिन र उच्च गतिको वाईफाईले सुसज्जित १६ सिटको क्याबिन छ। ग्राहकको इच्छाअनुसार यस क्याबिनमा एलईडी बत्ती जडान गर्न सकिन्छ। पार्टी र नृत्यका लागि छुट्टै ठाउँ पनि छ।
यो जेटसँग १२ घन्टाको प्रभावशाली नन–स्टप उडान क्षमता छ। उदाहरणका लागि यो जेटले दुबईदेखि लन्डन वा टोकियोसम्मको यात्रा एकपटक उडान भर्दा आरामसँग कभर गर्न सक्छ। यसमा पूर्ण रुपमा सुसज्जित भान्साकोठा र आठ व्यक्तिका लागि खाने टेबल पनि छ। जुन फाइभको होटल रेस्टुरेन्टको मेनुमा आफूले खान चाहेको सबै चिज पाउन सकिन्छ।
त्यहाँ किंग साइजको ओछ्यानसहितको मास्टर सुइट र जहाजमा नुहाउने सुविधा पनि छ। यो पार्टी जेट भाडामा लिन चाहनेका लागि उपलब्ध छ। यसका लागि ठूलो रकम तिर्नुपर्नेछ। यो जेटमा बस्नका लागि १ घन्टाको १५ हजार डलर (करिब २० लाख नेपाली रुपैयाँ) तिर्नुपर्छ।
अप्रिल २०२३ बाट सञ्चालन सुरु भएदेखि यो विमान ५० भन्दा बढी पटक बुक गरिएको छ। जसमा भीआईपी र राष्ट्र प्रमुखहरुका लागि युरोप, अमेरिका, बेलायत, मध्यपूर्व, अफ्रिका र एसियामा चार्टर्ड उडानहरु पनि समावेश छन्। –एजेन्सी
