काठमाडौं । बैंकिङ प्रणालीबाट एकैदिन १३ अर्ब रुपैयाँ निक्षेप बाहिरिएको छ।
नेपाल राष्ट्र बैंकको पछिल्लो तथ्यांकअनुसार असार २५ गते एकैदिन बैंक तथा वित्तीय संस्थाहरुको निक्षेप १३ अर्ब रुपैयाँले घटेको हो। अघिल्लो दिनसम्म बैंक तथा वित्तीय संस्थाको कुल निक्षेप ६४ खर्ब ३२ अर्ब रुपैयाँ रहेकोमा असार २५ गते घटेर ६४ खर्ब १९ अर्ब रुपैयाँमा झरेको छ।
असार २५ मा वाणिज्य बैंकहरुको कुल निक्षेप १३ अर्ब रुपैयाँले घटेर ५६ खर्ब ९० अर्ब रुपैयाँमा झरेको छ। अघिल्लो दिनसम्म वाणिज्य बैंकहरुको कुल निक्षेप ५७ खर्ब ३ अर्ब रुपैयाँ थियो।
बैंक तथा वित्तीय संस्थाको कुल कर्जा लगानी भने असार २५ मा ३ अर्ब रुपैयाँले बढेर ५१ खर्ब ५९ अर्ब रुपैयाँ पुगेको छ।अघिल्लो दिनसम्म कुल कर्जा लगानी ५१ खर्ब ५६ अर्ब रुपैयाँ थियो।
असार २५ मा बैंकहरुको अन्तरबैंक ब्याजदर बढेर ३ प्रतिशत पुगेको छ। अघिल्लो दिनसम्म अन्तरबैंक ब्याजदर २.९९ प्रतिशत थियो। असार २५ मा बैंकहरुको औसत सीडी रेसियो ७८.९४ प्रतिशत रहेको छ।
