काठमाडौं । भारतको मुम्बई शहरमा जीवन बीमावापत भारू १ करोड १० लाख (१ करोड ७६ लाख रूपैयाँ) बीमा दाबी हात पार्न एउटै बीमित महिलालाई दुई पटक मृत घोषित गरिएको छ ।
महाराष्ट्र प्रहरीको भनाई उद्घृत गर्दै टाइम्स अफ इण्डियाले उल्लेख गरे अनुसार धोकाधडीबाट कुल भारू १ करोड १० लाख हात पार्ने षड्यन्त्र अन्तर्गत ठगहरूले भारू ७० लाख दाबी भुक्तानी लिई सकेका थिए ।
मुम्बईको भाइण्डर निवासी ४५ वर्षिया कञ्चन पाई जसलाई पवित्रा उपनामले समेत चिनिन्छ, उनलाई परिवारका सदस्यले दुई वर्षमा दुई पटकसम्म मृत घोषि गराएर मृत्यु दाबीवापतको रकम हात पार्ने योजना बनाएका हुन् ।
प्रहरीका अनुसार ती महिलाको श्रीमान् र छोराले २०२१ र २०२३ को बीचमा निजी क्षेत्रका पाँच बीमा कम्पनीबाट बेग्ला बेग्लै दाबीमार्फत् कूल भारू १ करोड १० लाख रुपैयाँ दाबी गरेका थिए ।उनीहरूले मृत्यु दाबीमा करिब ७० लाख रुपैयाँ प्राप्त गरेका थिए र बाँकी रकमको पनि दाबी भुक्तानीको पर्खाईमा रहेका थिए ।
टाइम्स अफ इण्डियाका अनुसार प्रहरीले अनुसन्धान शुरू गरेपछि श्रीमान श्रीमति र छोरा समेत तीनैजना फरार छन् ।
मृत्यु दाबी भुक्तानीको रकम हात पार्नका लागि उनीहरूले चिकित्सकको सहयोगमा मृत्यु प्रमाणपत्र र दाहसंस्कार रसिद हात पारेका थिए । यो घटनामा दोषी पाइएका ५० वर्षीय चिकित्सक डा. आशुतोष यादव पनि फरार छन् ।
