काठमाडौं । नेपाल राष्ट्र बैंकले आर्थिक वर्ष २०७९/८०मा साढे ८७ अर्ब रुपैयाँ बढी नाफा आर्जन गरेको छ।
राष्ट्र बैंकका गभर्नर महाप्रसाद अधिकारीले आज अर्थमन्त्री डा. प्रकाशशरण महतलाई गत आर्थिक वर्षको वार्षिक प्रतिवेदन बुझाएका छन्। प्रतिवेदनमा राष्ट्र बैंकले गत आर्थिक वर्षमा ८७ अर्ब ६० करोड रुपैयाँ बढी नाफा आर्जन गरेको उल्लेख छ।
अघिल्लो आर्थिक वर्ष २०७८/७९मा राष्ट्र बैंकले ६१ अर्ब ९८ करोड रुपैयाँ नाफा आर्जन गरेको थियो। यो हिसाबले अघिल्लो आर्थिक वर्षको तुलनामा गत आर्थिक वर्षमा राष्ट्र बैंकको नाफा २९ प्रतिशतले बढीले बढेको छ।
गत आर्थिक वर्षमा राष्ट्र बैंकले वैदेशिक मुद्राबाट ४७ अर्ब २२ करोड रुपैयाँ र नेपाली मुद्राबाट १५ अर्ब ३४ करोड रुपैयाँ ब्याज आम्दानी गरेको छ । राष्ट्र बैंकको सञ्चालन आम्दानी भने ६६ अर्ब ९२ करोड रुपैयाँ रहेको छ।
प्रतिवेदनमा उल्लेख भएअनुसार गत आर्थि वर्षमा राष्ट्र बैंकका सञ्चालकहरुले तलबभत्ताबापत २ करोड रुपैयाँ बढी बुझेका छन्।
वार्षिक प्रतिवेदन बुझाउने क्रममा गभर्नर अधिकारी र अर्थमन्त्री महतबीच चालु आर्थिक वर्षको मौद्रिक नीतिको प्रथम त्रैमासिक समीक्षाका विषयमा छलफल भएको बताइएको छ।
