काठमाडाैं । दुई वर्षयता नेपाल लाइफ इन्स्योरेन्समा आवद्ध अभिकर्ताकाे कमिशनवापतकाे आम्दानी क्रमशः ओरालाे लाग्दै गएकाे छ। अभिकर्ताले कमिशन तथा इन्सेन्टिभ(प्राेत्साहन)वापत पाउने रकम आर्थिक वर्ष २०७७/७८ यता आएर क्रमशः खुम्चिंदै गएकाे हाे ।
नेपाल लाइफका अनुसार गत आर्थिक वर्ष २०७९/८० मा अभिकर्ता कमिशन वापतकाे खर्च रकममा करिब १२ प्रतिशतले कटाैती भएकाे छ। अघिल्लाे आव २०७८/७९ मा अभिकर्ताले कमिशन तथा इन्सेन्टिभवापत नेपाल लाइफबाट ३ अर्ब ५२ कराेड ९९ लाख रुपैयाँ भुक्तानी लिएका थिए । गत आव २०७९/८० मा अभिकर्ताले जम्मा ३ अर्ब १० कराेड ७० लाख रुपैयाँ कमिशन पाएका छन् । एक वर्षकाे अन्तरालमा अभिकर्ता कमिशनकाे रकम ४२ कराेड २९ लाख रुपैयाँभन्दा बढीले खुम्चिएकाे छ।
प्रथम बीमाशुल्क वापतकाे आम्दानीमा उल्लेख्य गिरावट आएकाले पनि अभिकर्ताकाे कमिशनवापतकाे आम्दानीमा कटाैती भएकाे हाे । नेपाल लाइफकाे व्यवस्थापनले पछिल्लाे समय सूचना प्रविधि र वैकल्पिक वितरण माध्यमलाई प्राथमिकता दिंदै परम्परागत वितरण प्रणालीमाथिकाे निर्भरता घटाउँदै लैजाने रणनीति अपनाएकाे छ।
आव २०७६/७७ काे तुलनामा आव २०७७/७८ मा अभिकर्ता कमिशन खर्च १३ प्रतिशतले वृद्धि भएकाेमा गत आवमा आएर करिब १२ प्रतिशतले खुम्चिएकाे छ। २०७६/७७ मा अभिकर्ताले ३ अर्ब १४ कराेड ४३ लाख रुपैयाँ कमिशन पाएका थिए । २०७७/७८ मा यस्ताे कमिशन बढेर ३ अर्ब ५५ कराेड ६३ लाख रुपैयाँ पुगेकाे थियाे ।
