काठमाडौं। कर्जा लिएका ऋणीलाई विभिन्न वहानामा दु:ख दिएको भन्दै झापाका व्यवसायी दुर्गा प्रसाईंले शुरु गरेको अभियान अन्तर्गत शनिबार राजधानीमा विशाल प्रदर्शन भएको छ।
आर्थिक मन्दीको समयमा बैंकले अनावश्यक रूपमा कर्जाको ब्याजदर वृद्धि गरेको र अनेक बहानामा सेवाशुल्क लगायत असुली गरेकोमा विरोध जनाउँदै प्रदर्शनमा सहभागी व्यापारीले नाराबाजी गरेका थिए।
उनीहरुले अहिलेको मन्दीको समयमा साँवा ब्याजको किस्ता तिर्न नसकेर समस्यामा परेका व्यापारीलाई राहत दिनुको साटो सस्तो मूल्यमा जबरजस्ती धितो लिलाम बिक्री गरेर बैंक तथा वित्तीय संस्थाले ज्यादती गरेको आरोप लगाएका छन्।
प्रदर्शनलाई मध्यनजर गर्दै काठमाण्डौ शहरको मुख्य चोक तथा संवेदनशील क्षेत्रमा ठूलो संख्यामा सुरक्षाकर्मी परिचालन गरिएका छन्।