काठमाडौं । नेपाल लाइफ इन्स्योरेन्स कम्पनीका दुई सञ्चालकले नियम विपरित शेयर धितोमा राखेर कर्जा लिएका छन् । सञ्चालक द्धय शक्तिकुमार गोल्याण र विवेक अग्रवालले नियम भन्दा बाहिर गएर आफ्नो नामको शेयर धितोमा राखेर कर्जा लिएका हुन् ।
नियम अनुसार संस्थापक शेयरधनीले आफूले धारण गरेको शेयर मध्ये ५० प्रतिशत भन्दा बढी शेयर धितो राखी कर्जा लिन पाउदैनन् । तर नेपाल लाइफका दुई सञ्चालक शक्ति कुमार गोल्याणले आफू सँग भएको शेयर मध्ये ७३.६९ प्रतिशत शेयर धितोमा राखेर कर्जा लिएका छन् ।
उनि सँग ५ लाख ७९ हजार ३८५ कित्ता शेयर रहेको छ । यस मध्ये गोल्याणले ४ लाख २६ हजार ९२९ कित्ता शेयर धितोमा राखेर कर्जा लिएका छन् । त्यस्तै विवेक अग्रवालले पनि आफू सँग भएको शेयर मध्ये ८० प्रतिशत शेयर धितोमा राखेर कर्जा लिएका छन् ।
अग्रवाल सँग २ लाख ९३ हजार २३ कित्ता शेयर रहेको छ । उनले यस मध्ये २ लाख ३६ हजार १७२ कित्ता शेयर धितोमा राखेर कर्जा लिएका छन् ।
नियम अनुसार एक प्रतिशत भन्दा माथिको संस्थापक शेयर पूँजी भएका शेयरधनीहरुले शेयरधितो राखी कर्जा लिनु परेमा पूर्व स्वीकृति लिनु पर्ने व्यवस्था छ । दुबैले नेपाल बीमा प्राधिकरणबाट स्वीकृत नलिइ कर्जा लिनै पाउदैनन् ।
उक्त शेयर धितोमा राखेको कुरालाई बीमा समितिले लेखापरीक्षण प्रतिवेदन स्वीकृत गर्ने वेलामा राम्रो सँग हेरेका हुन्छन् । यसरी नियम विपरित भएको लगानीलाई प्राधिकरणले स्वीकृत गरेको देखिन्छ । एकातिर कम्पनीले नियम विपरित लगानी गर्ने अर्को तर्फ नियामक निकाय प्राधिकरणले अनुमोदन गर्ने काम गैरकानुनी अभ्यास हो ।
