काठमाडौं । नेपाल लाइफले आर्थिक वर्ष २०७७/७८ मा प्रमुख कार्यकारी अधिकृतलाई वार्षिक एक करोड १३ लाख तलब भत्ता तथा अन्य सुविधा प्रदान गरेको छ । यो तलब सुविधा निवर्तमान प्रमुख कार्यकारी अधिकृत सन्तोष प्रसाइले बुझेका हुन् ।
प्रसाइले २०७७ साउन एक गतेदेखि माघ २८ गतेसम्म कार्यवाहक प्रमुख कार्यकारी अधिकृतको जिम्मेवारी पाएका थिए । करिव ६ महिना पछि मात्रै उनले २०७७ माघ २८ गते प्रमुख कार्यकारी अधिकृतको जिम्मेवारी पाएका थिए । प्रसाइले पुर्ण रुपमा सिइओको जिम्मेवारी पाएको एक वर्ष पनि पुरा नगरी २०७८ कार्तिक १८ गते राजिनामा दिएर बाहिरिएका थिए । विवेक झाले २०७७ असार ३१ दोस्रो कार्यकाल पुरा गरेर बाहिरिए पछि प्रसाइले जिम्मेवारी पाएका थिए ।
कम्पनीले सार्वजनिक गरेको २२ औ वार्षिक प्रतिवेदन अनुसार आर्थिक वर्ष २०७७/७८ मा प्रमुख कार्यकारी अधिकृतले निश्चित वार्षिक तलब तथा भत्ता ६३ लाख ६३ हजार रुपैयाँ बुझेका छन् । कार्यसम्पादनमा आधारित परिश्रमिक स्वरुप प्रोत्साहन सुविधा बापत थप २२ लाख र अन्य सुविधाहरु २७ लाख सहित जम्मा एक करोड १३ लाख रुपैयाँ बुझेको पाइएको छ । यो सबै प्रासाइले नै बुझेका हुन् ।
यस आर्थिक वर्षमा सञ्चालकहरुले बैठक भत्ता बापत ८४ लाख ३६ हजार रुपैयाँ बुझेको पाइएको छ । त्यस्तै उच्च व्यवस्थापन तहका १९ जना कर्मचारीले तलब भत्ता दशै खर्च र सञ्चयकोष सुविधा बापत ७ करोड ६९ लाख प्राप्त गरेका छन् ।
यस बाहेक कर्मचारीले सेवा, शर्ता तथा सुविधा अनुसार संचयकोष बापत २ करोड ६ लाख, वार्षिक तथा अनिवार्य विदा बापतको संचित र भुक्तानी २ करोड २८ लाख, जीवन बीमा प्रिमियम बापतको भुक्तानी एक करोड २१ लाख, दशै भत्ता बापत २ करोड ८९ लाख तथा गाडी सुविधा बापत २ करोड ५८ लाख रुपैयाँ प्रदान गरिएको कम्पनीले जनाएको छ ।
यस आर्थिक वर्षमा कर्मचारी खर्च मात्रै ५९ करोड ३९ लाख र प्रशासकिय खर्च एक अर्ब ९५ करोड सहित कुल व्यवस्थापन खर्च २ अर्ब ५४ करोड रुपैयाँ रहेको छ । यसरी नेपाल लाइफ जस्तो सर्वाधिक बीमितको सञ्जाल भएको कम्पनीलले २ खर्ब ५४ करोड खर्च गर्नु भनेको बीमित माथिकै भार हो ।
