काठमाडौं । ऋणमा डुबेको भारतीय रिलायन्स क्यापिटलको निर्जीवन बीमा व्यवसायका लागि छुट्टाछुट्टै बोलपत्र पेश गर्ने पिरामल फाइनान्सियल र जुरिच इन्स्योरेन्सले संयुक्त लगानीमा बोलपत्र बनाउने निर्णय गरेका छन् ।
प्रस्तावित संयुक्त उद्यम कम्पनीमा पिरामल र जुरिचको ५० प्रतिशत हिस्सा हुने इन्डो(एशियन न्यूज सर्भिसले उल्लेख गरेको छ। यो प्रस्तावित संयुक्त अधिग्रहण सफल भयो भने, यसले भारतीय निर्जीवन बीमा बजारमा जुरिच इन्स्योरेन्सको प्रवेशलाई सुनिश्चत गर्नेछ । तीन सम्भावित लगानीकर्ताहरू ( पिरामल फाइनान्स, जुरिच, र अमेरिकामा आधारित सम्पत्ति व्यवस्थापन फर्म एडभेन्ट) ले रिलायन्स जनरल इन्स्योरेन्सका लागि क्रमशः भारु ३६ अर्ब,३७ अर्ब, र ७० अर्बको बोल लगाएका छन्।
रिलायन्स क्यापिटलले १४ वटा गैर बाध्यकारी बोलपत्र प्राप्त गरेको छ । पूरै कम्पनीका लागि ६ कम्पनीले बोलपत्र पेश गरेका थिए भने बाँकी बोलपत्रदाताले विभिन्न सहायक कम्पनीका लागि बोलपत्र पेश गरेका थिए ।
