काठमाडौं । नेपाल विद्युत प्राधिकरणले विद्युतीय सवारीसाधनका लागि फास्ट चार्जिङ स्टेसन सञ्चालनमा ल्याएको छ । मंगलबार ऊर्जा जलस्रोत तथा सिंचाई मन्त्री पम्फा भुसालले उक्त चार्जिङ स्टेसनको उद्घाटन गरेकी हुन् । यो चार्जिङ स्टेसनको क्षमता ६० किलोवाटका दुईवटा डिसी र २२ किलोवाटको एसी गन रहेका छन् । १२० किलोवाट डिसीसम्म पनि सिंगल डिसी गनले गाडीहरु चार्ज गर्न सकिने प्राधिकरणले जनाएको ।
२६ वटा ठूला बस, माइक्रो, ट्रक, पिकअप तथा कारका लागि र २५ वटा साना ठूला कारहरुका लागि मिल्ने चार्जर रहेको छ । नेपालमा उपलब्ध सवारीसाधनहरुमा रहेको ब्याट्रीको क्षमता अनुसार कम्तीमा आधा घण्टादेखि एक घण्टासम्ममा फुल चार्ज हुने प्राधिकरणले जनाएको छ ।
चार्ज गर्दा कारहरुका औसत ७० पैसा, एसयुभीहरुमा ८० पैसा, माइक्रो बसमा ९० पैसा र बसहरुमा एक रुपैयाँ २० पैसा प्रतिकिलोमटर खर्च लाग्नेछ । समय अनुसार इनर्जी शुल्क फरक फरक रहेको छ । मझौला भोल्टेज (३३ केभी)को पिक (साँझ ५ देखि राति ११ बजेसम्म) ८.४० रुपैयाँ, अफ पिक राति ११ बजेदेखि भोलिपल्ट बिहान ५ बजेसम्म ४.४५ रुपैयाँ, अन्य (बिहान ५ देखि साँझ ५ बजेसम्म) ६.६० रुपैयाँ प्रतिकिलोवाट घण्टा (युनिट) पर्नेछ ।
मझौला भोल्टेज (११ केभी) मा पिक (साँझ ५ देखि राति ११ बजेसम्म) ८.६० रुपैयाँ, अफ पिक राति ११ बजेदेखि भोलिपल्ट बिहान ५ बजेसम्म ५.०५ रुपैयाँ, अन्य (बिहान ५ बजेदेखि साँझ ५ बजेसम्म) ६.७० रुपैयाँ युनिट पर्नेछ ।
तल्लो भोल्टेज (२३०/४०० भोल्ट) मा पिक (साँझ ५ देखि राति ११ बजेसम्म) ८.७० रुपैयाँ, अफ पिक राति ११ बजेदेखि भोलिपल्ट बिहान ५ बजेसम्म ५.०५ रुपैयाँ, अन्य (बिहान ५ बजेदेखि साँझ ५ बजेसम्म) ६.९० रुपैयाँ युनिट पर्नेछ ।
चार्जिङ स्टेसन सञ्चालकले विद्युतीय सवारीसाधनलाई चार्जिङ सेवा दिए बापत २० प्रतिशत किलोवाट घण्टा थप गरि लिन पाउने व्यवस्था रहेको छ । चार्जिङ स्टेसन सर्वसाधारणले पनि प्रयोग गर्न सक्नेछन् । त्यसका लागि नेसनल सर्भिस प्रोभाइडर प्रणालीको विकास गरिएको छ । जसमा उपभोक्ताले अनलाइन बुकिङ गर्न सक्नेछन् । भुक्तानीका लागि प्राधिकरणको मोबाइल एप प्रयोग गर्न सकिनेछ ।
प्राधिकरणले अझै ५० वटा स्टेसन बनाइरहेको छ । प्राधिकरणले देशका विभिन्न ३२ स्थानमा ५० वटा विद्युतीय सवारीसाधन चार्जिङ स्टेसन निर्माणको काम धमाधम गरिरहेका छ । पाँच स्थानमा तयार भएको छ । बल्खु, साझा,खुर्कोट लगायतका स्थानमा तयार भएको छ ।
