कठमाडौं । नेक्सजेन म्यानेजमेन्ट सोलुसन्स प्रा.लि.ले देशभर जीवन बीमा सम्बन्धि सर्भे गरेको छ । कम्पनीले गत चैत महिनामा सातैै प्रदेशको प्रतिनिधित्व हुनेगरी ३१ जील्लाको ४८ स्थानमा बीमा सम्बन्धि गतिविधिलाई लिएर सर्भे सम्पन्न गरेको हो । सर्भेमा ४९२ जना बीमितलाई संलग्न गरिएको थियो जसमध्ये १९० महिला र ३०२ जना पुरुष रहेका थिए ।
प्रत्येक क्षेत्रबाट न्यूनतम ५ र बढीमा १० जना बीमितलाई सर्भेमा समावेश गरिएको कम्पनीले जनाएको छ । बीमा समितिले दिएको तथ्याङ्कमा बीमाको कभरेज १० वर्षभित्र ७ प्रतिशतबाट बढेर ३५ प्रतिशतभन्दा माथि पुगेको छ । कमरेज बढेअनुसार फोर्सफुलमा बीमा गर्ने भन्दा स्वेच्छाले बीमा गर्नेहरुको संख्या बढ्दै गइरहेको देखिन्छ । यस सर्भेमा पनि जीबन बीमा प्रतिको जनचेतना र आकर्षण बढ्दै गएको पुष्टि भएको छ ।
सर्भेमा संलग्न व्यक्तिहरुलाई बीमा किन गर्नुपर्छ भन्ने प्रश्नमा ८९ प्रतिशतले महत्व बुझेर गरेको भन्ने उत्तर दिएका थिए भने कम्पनीको बारेमा सोध्दा ७५ प्रतिशतले कम्पनीको बारेमा थाहा भएको कुरा गरेका थिए । साथै बीमाको आवश्यकताको बारेमा भने ८५ प्रतिशतले अति आवश्यक भएको बताएका थिए ।
सर्भेमा बीमांकलाई अझै आकर्षित बनाउन ७६ प्रतिशतले जनचेतना बढाउनुपर्ने, ५ प्रतिशतले गरिवको लागि सरकारले केही राहत दिनुपर्ने र १९ प्रतिशतले राम्रो प्रोडक्ट र गुणस्तरीय सेवामा जोड दिनुपर्ने जानकारी दिएका थिए । साथैै बीमा प्रतिको आकर्षण बढेको र जनचेतना पनि अभिबृद्धि भइरहेको अनुसन्धानले पुष्टि गरेको कम्पनीले जनाएको छ ।
