काठमाडौं । जीवन बीमा कम्पनीहरुले भोलि आर्थिक वर्षको अन्तिम दिन शनिवार परेता पनि कार्यालय खुलै राख्ने भएका छन् । कम्पनीहरुले भोलि शनिवार पनि जीवन बीमा पोलिसी बिक्री गर्न कार्यालय खुला राख्ने भएका हुन् ।
सम्पुर्ण जीवन बीमा कम्पनीहरुले सूचना जारी गर्दै भोलि शनिवार पनि कार्यालय खुला रहने जानकारी दिएका छन् । बीमा कम्पनीहरुले भोलि अन्तिम समयसम्म पनि पोलिसी स्वीकृत गर्नेछन् । आर्थिक वर्षको अन्तिम दिन बीमा कम्पनी, अभिकर्ता र कर्मचारीको अग्नी परिक्षा हो । भोलिसम्ममा तोकिएको टार्गेट पुरा गरे मात्रै तोकिएको सेवा सुविधा लिन सकिन्छ । अन्यथा इन्सेन्टिभ तथा सेवा सुविधाबाट विमुख हुनु पर्नेछ । बीमा कम्पनीहरुले पनि आफुलाई बजारमा बलियो देखाउन भोलिसम्ममा धेरै भन्दा धेरै व्यवसाय भित्र्याउने प्रयास गरिरहेका हुन्छन् ।
कतिपय अभिकर्ताहरुले आफ्नो तोकिएको टार्गेट पुरा गरिसकेका छन् भने कतिपय अझै पनि तनावमा छन् । एजेन्सी म्यानेजर पनि नविकरण गर्न नसक्ने अवस्थामा पुगेका अभिकर्ताहरु ग्राहक खोजिमा छन् । कतिपय बीमा कम्पनीहरुले पनि मासिक रुपमा नै टार्गेट सेट गर्दै आएका छन् । यसरी मासिक रुपमा टार्गेट पुरा गर्दै आएका शाखाहरुलाई कुनै पनि समस्या छैन । तर मासिक टार्गेट पनि पुरा नभएका शाखा प्रवन्धकहरु पनि अभिकर्ताहरुलाई पोलिसी ल्याउन दवाव दिदै आएका छन् । उनिहरुको मूल्याङ्कन कम्पनीले दिएको टार्गेटका आधारमा पनि हुने भएकाले शाखा प्रवन्धकहरु आफै व्यवसाय भित्र्याउन सक्रिय रहन्छन् ।
बीमा समितिले भोलि राति १२ बजेदेखि सफ्टवेयर लक गर्न निर्देशन दिएको छ । यस वर्ष एपिआई मार्फत सम्पुर्ण बीमा कम्पनीहरुको निगरानी गर्ने योजना भने पुरा हुन सकेन । बीमा कम्पनीहरुको सफ्टवेयर मार्फत बीमा समितिको एपिआइमा जोड्न समितिका अध्यक्ष सूर्य प्रसाद सिलवालले निर्देशन दिए पनि बीमा समितिकै प्राविधिकहरुले राम्रो सँग काम गर्न सकेनन् । कम्पनीहरुले पनि यसमा नसकिने भन्दै जवाफ दिएका थिए ।
भोलि बीमा कम्पनीका साथै बैंकहरु पनि खुला रहनेछन् । आर्थिक वर्षको अन्तिम दिनमा बीमा कम्पनी, व्यवसायिक संस्थाहरुले कारोबार गर्नेभएकाले पनि बैंकहरुले आफ्ना शाखा कार्यालयहरु खुला राख्ने छन् ।
