काठमाडौं । बीमा समितिले क्रस होल्डिङ भएका बीमा कम्पनीहरुलाई मर्जरमा जान दवाव दिए सँगै आइएमई समुहले नेपाल इन्स्योरेन्स कम्पनीमा रहेको शेयर बिक्री गर्ने भएको छ । आइएमई समुहले क्रस होल्डिङ हटाए सँगै यसै समुहको लगानी रहेको आइएमई जनरल इन्स्योरेन्स कम्पनी र नेपाल इन्स्योरेन्स कम्पनी एक आपसमा मर्ज नहुने पक्का भएको छ ।
आइएमई लिमिटेड, आइएमई इन्भेष्टमेन्ट प्रा.लि. र आइएमई होल्डिङ्ग प्रा.लि.ले आफ्नो नाममा रहेको शेयर बिक्रीका लागि नेपाल इन्स्योरेन्स कम्पनीलाई निवेदन दिएका छन् । आइएमई समुहले आफ्नो शेयर बिक्री गर्न निवेदन दिए सँगै नेपाल इन्स्योरेन्स कम्पनीले हाल विध्यमान शेयरधनीहरुलाई उक्त शेयर खरिदका लागि ३५ दिने सूचना जारी गरेको छ ।
आइएमई समुहका तीन वटै संस्थापकको नाममा ७ लाख १९ हजार २०५ कित्ताका दरले २१ लाख ५७ हजार ६१५ कित्ता शेयर रहेको छ । यस समुहले उक्त शेयरको न्युनतम बिक्री मुल्य ३२५ रुपैयाँ तोकेको छ । यदि ३५ दिन भित्र विध्यमान संस्थापक शेयरधनीहरुले खरिद गर्न नचाहेमा कम्पनीले अन्य लगानीकर्ताका लागि आह्वान गर्नेछ । अहिले तोकिएको न्युनतम मूल्यकै आधारमा पनि आइएमई समुहले उक्त शेयर बिक्री गरेर ७० करोड १२ लाख रुपैयाँ पाउनेछ ।
आइएमई समुहको लगानी रहेको आइएमई जनरल इन्स्योरेन्स कम्पनी र नेपाल इन्स्योरेन्स कम्पनी एक आपसमा मर्जरमा जाने अनुमान गरिएको थियो । अव मर्जर नहुने लगभग पक्का भएको छ । आइएमई जनरलले अन्य कम्पनी सँग मर्जर गर्ने योजना अनुरुप नै अहिले शेयर बिक्री गर्न थालेको हो ।
बीमा समितिले गत वर्ष क्रस होल्डिङ्ग देखिएका बीमा कम्पनीहरुलाई पत्र काटेर मर्जरमा जाने या शेयर बिक्री गर्ने मध्ये एउटा उपाय रोज्न निर्देशन दिएको थियो । समितिको निर्देशन अनुरुप नै आइएमईले शेयर बिक्री गर्न खोजेको देखिन्छ । आइएमई समुहले नेपाल इन्स्योरेन्स कम्पनीको शेयर बिक्री गरेर आइएमई जनरललाई अर्को कम्पनी सँग मर्ज गराउने देखिन्छ ।
