काठमाडौं । चुनाव सकिए सँगै बैंकिङ प्रणालीमा निक्षेप आउन थालेको छ । चुनाव अगाडी बैंकिङ प्रणालीबाट ४ अर्ब रुपैयाँ निक्षेप बाहिरिएकोमा चुनाव पछि जेठ पहिलो सातामा ७ अर्बले बढेको छ ।
बाणिज्य बैंकहरुको निक्षेप ७ अर्बले बढेर ४३ खर्ब ७७ अर्ब रुपैयाँ पुगेको छ । त्यस्तै कर्जा लगानी पनि २ अर्बले बढेर ४१ खर्ब ९४ अर्ब रुपैयाँ पुगेको छ ।
चालु आर्थिक वर्षमा कुल निक्षेप १ खर्ब ७५ अर्ब रुपैयाँले बढेको छ । ऋण भने ४ खर्ब ७३ अर्ब रुपैयाँले बढेको छ ।
बैशाख २ गते वाणिज्य बैंकहरुमा ४३ खर्ब ७७ अर्ब रुपैयाँ निक्षेप रहेको थियो । उक्त निक्षेप बैशाख ९ गतेसम्म आइपुग्दा १० अर्बले घटेर ४३ खर्ब ६७ अर्ब रुपैयाँमा झरेको थियो । त्यस्तै, बैशाख ९ गतेदेखि १६ गतेसम्मको अवधिमा भने एक अर्ब रुपैयाँले निक्षेप बढेको थियो ।
त्यस्तै, बैशाख १६ गते देखि २३ गतेसम्म ५ अर्ब रुपैयाँले निक्षेप बढेर ४३ खर्ब ७३ अर्ब पुगेको थियो । बैशाख २३ गते देखि ३० गते सम्म आइपुग्दा उक्त निक्षेप घटेर ४३ खर्ब ७० अर्ब रुपैयाँमा पुगेको नेपाल बैंकर्स संघको तथ्यांकमा उल्लेख छ ।
