काठमाडौं । हिमालयन बैंकले पुस अन्तिम अर्थात ३० गते ३९ औ वार्षिक साधारणसभा बोलाएको छ । बैंकले आफ्नै केन्द्रिय कार्यालय कमलादीमा भर्चुअल माध्यमबाट साधारणसभा गर्ने भएको छ । सभाले सञ्चालक समितिबाट प्रस्ताव भएको २१.३८ प्रतिशत बोनश शेयर र बोनश शेयरमा लाग्ने कर प्रयोजन सहित ४.६२ प्रतिशत नगद लाभांशलाई पारित गर्नेछ ।
सभाले नेपाल इन्भेष्टमेन्ट बैंक सँग एक बराबर एकको अनुपातमा मर्ज गर्ने प्रस्ताव स्वीकृतका लागि पनि सभामा पेश गर्ने भएको छ । सभाले मर्जका लागि तयार पारिएको डिडिए प्रतिवदेन पनि स्वीकृतिका लागि साभामा पेश गर्नेछ ।
सञ्चालक समितिको तर्फबाट अध्यक्षले आर्थिक वर्ष २०७७/७८ को प्रतिवेदन उपर छलफल गरि पारित गर्ने प्रस्ताव रहेको छ । त्यस्तै लेखापरीक्षण प्रतिवेदन, वित्तीय विवरण, नाफा नोक्सान नगद प्रवाह विवरण उपर छलफल गरि पारित गर्ने सामान्य प्रस्ताव रहेको छ ।
साधारणसभा प्रयोजनका लागि बैंकले पुस ११ गतेदेखि पुस ३० गतेसम्म बुक क्लोज गर्ने जनाएको छ । नेपाल इन्भेष्टमेन्ट बैंक सँग मर्जर संझौता भए पछि बैंकको शेयर कारोबार बन्द छ । यसले गर्दा प्रस्तावित लाभांश संझौता भन्दा अगाडीकै शेयरधनीले मात्रै प्राप्त गर्नेछन् ।
बैंकको हालको चुक्ता पूँजी १० अर्ब ६८ करोड रुपैयाँ रहेको छ । प्रस्तावित बोनश शेयर पछि बैंकको चुक्ता पूँजी १२ अर्ब ९६ करोड रुपैयाँ पुग्नेछ ।
