काठमाडौं । एनएमबि बैंकले दुई वटा जलविद्युत आयोजनामा मुख्य लगानीकर्ता भई वित्तीय व्यवस्थापन गर्ने भएको छ । उक्त कम्पनीले १३ दशमलव ५ मेगावाट तथा १२ मेगावाटका क्रमश: सुपर कावेली खोला ए जलविद्युत् आयोजना तथा सुपर कावेली खोला क्यासकेड जलविद्युत् आयोजनामा मुख्य लगानीकर्ता भई वित्तीय व्यवस्थापन गर्ने भएको हो ।
प्रदेश नं १ अन्तर्गत ताप्लेजुङ्ग जिल्लामा रहेको सिरीजङ्घा गाउँपालिकामा निर्माण भइरहेको सुपर कावेली खोला – ए जलविद्युत् आयोजना तथा सुपर कावेली खोला क्यासकेड जलविद्युत् आयोजनाहरु क्रमशः स्नो रिभर्स प्रालि तथा हिल्टन हाइड्रो इनर्जी प्रालिद्वारा निर्माण भइरहेको छ ।
उक्त आयोजनाहरुमा एनएमबि बैंक अगुवा बैंक रहेको छ भने सह वित्तीयकरणमा सहभागी अन्य बैंकमा राष्ट्रिय वाणिज्य बैंक लिमिटेड रहेको छ । १३ दशमलव ५ मेगावाट (सुपर कावेली खोला ए जलविद्युत आयोजना) तथा १२ मेगावाट (सुपर कावेली खोला क्यासकेड जलविद्युत आयोजना) क्षमता भएको आयोजनाहरुको कुल लागत क्रमशः २ अर्ब ४१ करोड रुपैयाँ तथा २ अर्ब १४ करोड रुपैयाँ रहेको छ । जसमध्ये ती बैंकहरुको लगानी क्रमशः १ अर्ब ८९ करोड रुपैयाँ तथा १ अर्ब ६७ करोड रुपैयाँ रहने जानकारी गराइएको छ ।
