काठमाडौं । नेपाल इन्भेष्टमेण्ट बैंक लिमिटेडले ३ दशमलव ३९ प्रतिशत नगद लाभांश आफ्ना शेयरधनीलाई वितरण गर्न शुरु गरेको छ । कम्पनीले मंसिर १७ गते सम्पन्न ३५औं वार्षिक साधारण सभाबाट पारित गरेको नगद लाभांश शेयरधनीका बैंक खातामा पठाएको हो ।
कम्पनीले हाल कायम चुक्तापूँजी १६ अर्ब २५ करोड ७३ लाख २९ हजार ५०० को आधारमा १२ दशमलव ६१ प्रतिशत बोनश शेयर र कर प्रयोजनका लागि समेत ३ दशमलव ३९ प्रतिशत नगद लाभांश वितरणको प्रस्ताव पारित गरेको हो ।
बोनश शेयर धितोपत्र दोस्रो बजारमा सूचीकरण पश्चात सम्बन्धित शेयरधनीहरुको हितग्राही खातामै जम्मा हुनेछ भने कर कटाएर बाँकी नगद लाभांश भने कम्पनीले सम्बन्धित शेयरधनीहरुको बैंक खातामै जम्मा गर्न शुरु गरेको बताएको छ ।
कम्पनीले मंसिर ६ गतेसम्म आफ्नो हितग्राही खातामा बैंक खाता अद्यावधिक गराइसकेका शेयरधनीहरुको हकमा सम्बन्धित बैंक खातामै नगद लाभांश जम्मा गरिरहेको र सो अवधिपश्चात बैंक खाता अद्यावधिक गराउनेहरुको हकमा समेत क्रमश जम्मा गरिदैं जाने बताएको छ ।
हालसम्म पनि बैंक खाता अद्यावधिक नगराएका शेयरधनीहरुलाई यथाशिघ्र बैंक खाता अद्यावधिक गराउन आग्रह गरेको छ ।