काठमाडौं । दुई बैंकले आर्थिक वर्ष २०७७ /७८ को लाभांश प्रस्ताव गरेको छ । गत आर्थिक वर्ष २०७७ /७८ को नाफाबाट माछापुच्छ्रे बैंक र सानिमा बैंकले लाभांश प्रस्ताव गरेका छन् । माछापुच्छ्रे बैंकले गत आर्थिक वर्ष २०७७/७८ को नाफाबाट १४ प्रतिशत लाभांश वितरण गर्ने घोषणा गरेको हो । बैंकको असोज ६ गते बसेको सञ्चालक समितिको बैठकले उक्त लाभांश दिने निर्णय गरेको हो ।
बैंकले हाल कायम चुक्ता पुँजीको १३ दशमलव ३० प्रतिशत बोनश शेयर र कर प्रयोजनका लागि ० दशमलव ७० प्रतिशत नगद लाभांश वितरण गर्ने प्रस्ताव गरेको हो ।
त्यसैगरी सानिमा बैंकले लगानीकर्तालाई १७ दशमलव ८९ प्रतिशत लाभांश वितरण गर्ने भएको छ । बैंकको असोज ६ गते बसेको सञ्चालक समितिको बैठकले उक्त लाभांश दिने निर्णय गरेको हो ।
बैंकले गत आर्थिक वर्ष २०७७/७८ को नाफाबाट चुक्ता पुँजीको १७ प्रतिशत बोनश शेयर ० दशमलव ८९ प्रतिशत नगद लाभांश वितरण गर्ने जनाएको छ ।
उक्त प्रस्तावित लाभांश नेपाल राष्ट्र बैंकले स्वीकृति दिएपछि र बैंकको आगामी साधारणसभाले पारित गरेपछि शेयरधनीहरुले पाउनेछन् ।
