काठमाडौं । बीमा समितिले आइएमई जनरल इन्स्योरेन्स कम्पनीलाई हकप्रद शेयर निष्काशनको अनुमति प्रदान गरेको छ । कम्पनीले गत बैशाख १२ गते सम्पन्न गरेको २३ औ वार्षिक साधारणसभाबाट ४० प्रतिशत हकप्रद शेयर निष्काशनको प्रस्ताव पारित गरेको थियो ।
साधारणसभाबाट पारित भएको हकप्रद निष्काशन गर्ने विशेष प्रस्ताव स्वीकृतिका लागि कम्पनी बीमा समिति पुगेको थियो । साधारणसभाबाट प्रस्ताव पारित गरिसकेकोले स्वीकृति प्रदान गरिएको समितिले जनाएको छ ।
अजोड इन्स्योरेन्स कम्पनीले हकप्रद शेयर निष्काशनको सूचना अगाडी नै चुहावट भएर दोस्रो बजारमा इन्साइडर कारोबार भएको भन्दै चर्को विरोध भए पछि बीमा समितिका अध्यक्ष सूर्य प्रसाद सिलवालले हकप्रद शेयर निष्काशनको प्रस्ताव सार्वजनिक गर्नु अगाडी बीमा समितिको स्वीकृति लिनु पर्ने बताएका थिए । सोहि समयमा समितिले हकप्रद शेयर निष्काशनको घोषणा गरेका सबै कम्पनीलाई रोक्ने भन्दै अभिव्यक्ति दिएको थियो ।
यहि सन्दर्भमा आइएमई जनरलको हकप्रद शेयर निष्काशन प्रकृयाँ पनि रोकिने समितिले जनाएको थियो । बीमा समितिको सोहि अभिव्यक्तिका कारण कम्पनीको हकप्रद शेयर निष्काशन अन्योलमा परेको थियो ।
कम्पनीले २३ औ वार्षिक साधारणसभा प्रस्तावित बोनस शेयर पश्चात कायम हुने चुक्ता पूँजीको ४० प्रतिशत अर्थात १०० कित्ता बराबर ४० कित्ताको अनुपातमा हकप्रद शेयर जारी गर्ने प्रस्ताव पारित गरिसकेको र बीमा समितिबाट पनि अनुमति पाए सँगै कम्पनीले अब नेपाल धितोपत्र बोर्डमा निवेदन दिने छ ।
प्रस्तावित ७ प्रतिशत बोनस शेयर पारित पश्चात कम्पनीको चुक्ता पूँजी एक अर्ब १५ करोड ७५ लाख रुपैयाँ पुगेको छ । यहि पूँजीको ४० प्रतिशत अर्थात ४६ करोड ३० लाख रुपैयाँको हकप्रद शेयर जारी गर्ने छ । हकप्रद शेयर निष्काशन पछि कम्पनीको चुक्ता पूँजी एक अर्ब ६२ करोड रुपैयाँ पुग्ने छ । मंगलबार दोस्रो बजारमा कम्पनीको शेयर मूल्य १४१६ रुपैयाँ रहेको छ । हकप्रद शेयर निष्काशन गर्ने सूचनाले कम्पनीको शेयर मूल्य दोस्रो बजारमा लगातार बढिरहेको छ ।
