काठमाडौं । एनआईसी बैंकले सम्पूर्ण बैंकिङ सेवा–सुविधा क्रमशः डिजिटल माध्यमबाट प्रदान गर्ने उद्देश्यले एनआईसी एशिया मोबैंकमार्फत आन्तरिक रेमिट्यान्स सुविधा ल्याएको छ । यस सेवा अन्तर्गत अब ग्राहकले जुनसुकै स्थान र जुनसुकै समयमा पनि आफ्नो एनआईसी एशिया मोबैंकबाट रेमिट रकम सहज रूपमा पठाउन सक्ने बैंकले जनाएको छ ।
ग्राहकले आफ्नो मोबाइल प्रयोग गरी बैंकको एनआईसी एशिया मोबैंकभित्र रहेको सेन्ड रेमिट आइकनमा ट्याप गरेपछि रेमिट्यान्स रकम, प्राप्त गर्नेको विवरण उल्लेख तथा रेमिट्यान्स पठाउनुको उद्देश्य छनोट गरेर रकम पठाउन सकिनेछ ।
पठाएको रकम देशभर रहेका बैंकका सम्पूर्ण शाखा तथा विस्तारित काउटरका साथै १० हजारभन्दा बढी रेमिट एजेन्टबाट नगद रकम सहजै झिक्न सकिनेछ ।
कोरोना महामारीको समय डिजिटल कारोबार गर्नुपर्ने अवस्थामा ल्याइएको यो सुविधामार्फत रेमिट्यान्स पठाउन सकिने हुँदा ग्राहकलाई बैंक शाखा पुग्नुपर्ने झन्झट हट्ने विश्वास बैंकले लिएको छ ।
हाल बैंकले ३५२ शाखा, ४७१ एटिएम, ७५ वटा विस्तारित काउन्टर एवं ८० वटा शाखारहित इकाइमार्फत बैंकिङ सेवा दिँदै आएको छ ।
