काठमाडौं । नेपाल इन्फ्राष्ट्रक्चर बैंकको मुनाफामा सामान्य सुधार देखिएको छ । बैंकले चालु आर्थिक वर्ष २०७७/७८ को तेस्रो त्रैमासिक अवधिमा ५८ करोड ९२ लाख रुपैयाँ नाफा आर्जन गरेको छ । गत वर्षको यहि अवधिमा ५८ करोड २० लाख रुपैयाँ नाफा गरेको थियो ।
पुर्वाधार क्षेत्रमा लगानी गर्ने उद्देश्यले स्थापना भएको यस बैंकले अहिलेसम्म जम्मा दुई अर्ब १९ करोड रुपैयाँ मात्रै लगानी गरेको छ । बैंकले चैतमसान्तसम्ममा १२ अर्ब ६१ करोड रुपैयाँको लगानी संझौता गरिसकेको छ । यो संझौता अहिले भए पनि आयोजनाले निर्माणको विभिन्न चरणमा लैजाने भएकाले बैंकले प्रतिबद्धता बापतको ठुलो रकम बैंक तथा वित्तीय संस्थामा जम्मा गरेर राखिरहेको छ ।
हाल बैंकले अन्य बैंकहरुमा १९ अर्ब ६६ करोड रुपैयाँ बचतको रुपमा जम्मा गरेर राखेको छ । यसै वर्ष सर्वसाधारणका लागि ८ अर्ब रुपैयाँ शेयर जारी गरेको थियो । उक्त शेयर पूँजी बापतको रकम पनि बैंकमा निक्षेपको रुपमा जम्मा गरेर राख्नु परेको छ ।
प्राथमिक शेयर निष्काशन पछि बैंकको चुक्ता पूँजी २० अर्ब रुपैयाँ पुगेको छ भने जगेडा कोषमा २ अर्ब १५ करोड रुपैयाँ जम्मा भएको छ । बैंकको आम्दानीको प्रमुख स्रोत व्याज आम्दानी थोरैले मात्रै बढेको छ । बैंक तथा वित्तीय संस्थाले व्याजदर घटाउदा बैंकको आम्दानी प्रभावित भएको हो । यस्तो आम्दानी ९३ करोड ५२ लाख रुपैयाँ मात्रै छ । पूँजी बृद्धि सँगै प्रतिशेयर आम्दानी ६ रुपैयाँबाट खुम्चिएर तीन रुपैयाँमा झरेको छ ।
