काठमाडौं । सुरक्षित लगानीको रुपमा सानिमा बैंकले निष्काशन गरेको चार अर्ब रुपैयाँ बराबरको ऋणपत्रमा लगानी गर्ने आज अन्तिम दिन हो । यही पुस १ गतेदेखि १५ गतेसम्मको मिति राखेर निष्काशन गरिएको ऋणपत्रमा संस्थागत लगानीकर्ताहरुको लागि सुनौलो अवसरको रुपमा हेरिएको छ ।
बैंक तथा वित्तीय संस्थाहरुले मुद्दति निक्षेपमा न्यून ब्याज दिइरहेको सन्दर्भमा ठूलो मात्रामा ऋणपत्र निष्काशन गरेको थियो । बार्षिक ८.५ प्रतिशत ब्याजदर दिइने ऋण पत्रका लागि आज बैंकिङ समयभित्रमा आवेदन दिइसक्नुपर्ने बिक्री प्रबन्धक एनआईसी एसिया क्यापिटलले जनाएको छ ।
१० वर्ष अवधि रहेको सो ऋणपत्रका लगानीकर्ताहरुलाई बैंकले वार्षिक ८.५ प्रतिशतका दरले प्रत्येक आर्थिक वर्षको प्रथम र द्वितिय त्रैमासिक समाप्त भएपश्चात भुक्तानी गर्ने जनाएको छ ।
उक्त ऋणपत्र प्रतिकित्ता एक हजार रुपैयाँ अंकित मूल्यको ४० लाख कित्तामा निष्काशन गर्न लागिएको छ । निष्काशित कुल ऋणपत्रमध्ये दुई अर्ब ४० करोड रुपैयाँबराबरको २४ लाख कित्ता ऋणपत्र व्यक्तिगत तवरबाट र एक अर्ब ३० करोड रुपैयाँ बराबरको १६ लाख कित्ता ऋणपत्र सर्वसाधारणका लागि बाँडफाँट गरिने कम्पनीले जनाएको छ ।
उक्त ऋणपत्रमा न्यूनतम २५ कित्ताका लागि दरखास्त दिन सक्नेछन् भने अधिकतममा १६ लाख कित्ताका लागि आवेदन दिन सक्ने कम्पनीले जनाएको छ ।
