काठमाडौं । विश्वभरिका बीमा प्रोफेशनलहरुको साझा संस्था एमडिआरटीको आगामी सम्मेलन सिंगापुरमा हुने भएको छ । एमडिआरटीले सन् २०२१ मा हुने विश्व सम्मेलनको स्थान तथा मिति सार्वजनिक गरेको हो ।
एमडिआरटीले जनाए अनुसार सन् २०२१ को अगष्ट २९ देखि सेप्टेम्वर १ मा एसियाको सिंगापुरमा हुनेछ । एमडिआरटीले आगामी वर्ष हुने एमडिआरटी सम्मेलनको लागि सदस्यता आवेदन खुल्ला गरेको जनाएको छ । वर्षभरिमा तोकिएको बीमा शुल्क वा कमिशन प्राप्त गर्ने बीमा अभिकर्ताले मात्रै एमडिआरटी विश्व सम्मेलनमा भाग लिन पाउनेछन् ।
जीवन बीमा प्रोफेशनलहरुको अन्तर्राष्ट्रिय फोरम एमडिआरटीमा हरेक अंग्रेजी वर्ष जनवरी १ देखि डिसेम्वर अन्तिम ३१ सम्म तोकिएको बीमा शुल्क संकलन गर्ने अभिकर्ताहरु उक्त सम्मेलनमा भाग लिन पाउनेछन् । मिलियन डलर राउण्ड टेवल अर्थात एमडिआरटी नाम दिइएको सो सम्मेलन हरेक वर्ष फरक फरक देशमा कार्यक्रम आयोजना गरिन्छ । आगामी वर्ष सिंगापुरमा आयोजना गर्न लागिएको हो ।
अमेरिकाको चिकागोमा मुख्यालय रहेको एमडिआरटीमा क्वालिफाईड भई विश्व सम्मेलनमा सहभागी भएपछि उक्त व्यक्तिको कार्य क्षमता बृद्धि हुने छ भने अन्तर्राष्ट्रिय क्षेत्रमा अनुभवी व्यक्तिहरुसँगको सहकार्यले बीमा व्यवसायमा थप योगदान गर्न समक्ष हुने विश्वास छ । नेतृत्व विकास र क्षमता अभिबृद्धिका लागि एमडिआरटी उत्कृष्ट अन्तर्राष्ट्रिय प्लेटफर्म हो ।
