काठमाडौं । नेपाल पुनर्बीमा कम्पनीले आर्थिक वर्ष २०७९ /८० को तेस्रो त्रैमासिकको अपरिष्कृत वित्तीय विवरण प्रकाशन गरेको छ । कम्पनीले प्रकाशन गरेको वित्तीय विवरण अनुसार समिक्षा अवधिको तुलनामा कम्पनीको जीवन बीमा तर्फको खुद बीमा शुल्क आर्जन बढेको छ भने निर्जीवन बीमा तर्फको खुद बीमा शुल्क घटेको छ ।
समिक्षा अवधिमा निर्जीवन बीमा तर्फबो जगेडा कोषमा ४ अर्ब ७८ करोड ६५ लाख संचिती रहेको छ । अघिल्लो वर्षको यसै अवधिमा निर्जीवन बीमा तर्फ ३ अर्ब ९१ करोड संचिती थियो । अघिल्लो वर्षको तुलनामा यस अवधिमा निर्जीवन बीमा तर्फको जगेडा कोष बलियो भएको हो । त्यस्तै, यस अवधिमा जीवन बीमा तर्फको जगेडा कोषमा ६० करोड २५ लाख संचिती छ । अघिल्लो वर्षको यसै अवधिमा कम्पनीको जीवन बीमा तर्फको संचिती ५९ करोड ५ लाख रहेको थियो । अघिल्लो वर्षको तुलनामा जगेडा कोषमा संचिती बढेको हो ।
समिक्षा अवधिमा निर्जीवन बीमा व्यवसायबाट कम्पनीले ५२ करोड ९ लाख ५२ हजार रुपैयाँ खुद बीमा शुल्क आर्जन गरेको छ । अघिल्लो वर्षको यसै अवधिमा कम्पनीले निर्जीवन बीमा व्यवसायबाट ६० करोड २१ लाख नाफा आर्जन गरेको थियो । अघिल्लो वर्षको तुलनामा निर्जीवन बीमा व्यवसायको नाफामा गिरावट आएको छ । त्यस्तै, यस समिक्षा अवधिमा कम्पनीले जीवन बीमा व्यवसायबाट ६ करोड ७१ लाख रुपैयाँ नाफा कमाएको छ । अघिल्लो वर्षको यसै अवधिमा जीवन बीमा व्यवसायतर्फको नाफा २ करोड ९७ लाख रुपैयाँ नोक्सानीमा थियो ।
यस अवधिमा कम्पनीको खुद बीमा शुल्क ४५ प्रतिशतले घटेको छ । यस अवधिमा कम्पनीले ४ अर्ब २६ करोड ७० लाख ३२ हजार रुपैयाँ खुद बीमा शुल्क आर्जन गरेको छ । जसमध्ये जीवन बीमा व्यवसायतर्फबाट १ अर्ब ४६ करोड अर्जन गरेको हो भने निर्जीवन बीमा व्यवसायतर्फबाट २ अर्ब ७९ करोड ८२ लाख आर्जन गरेको हो । अघिल्लो वर्षको यसै अवधिमा कम्पनीले ७ अर्ब ८६ करोड ८९ लाख खुद बीमा शुल्क आर्जन गरेको थियो । जसमध्ये ६ अर्ब ५३ करोड निर्जीवन बीमा व्यवसायतर्फको खुद बीमा शुल्क हो भने १ अर्ब ३२ करोड जीवन बीमा व्यवसाय तर्फको खुद बीमा शुल्क हो । अघिल्लो वर्षको तुलनामा जीवन तर्फको खुद बीमा शुल्क बढेको छ भने निर्जीवन तर्फको घटेको छ ।
समिक्षा अवधिमा कम्पनीको खुद दाबी भुक्तानी ६ दशमलव ४० प्रतिशतले बढेको छ । यस अवधिमा कुल ४ अर्ब ३२ करोड ५१ लाख ५ हजार रुपैयाँ खुद दाबी भुक्तानी गरेको छ । जसमध्ये निर्जीवन तर्फ ३ अर्ब २५ करोड २५ लाख खुद दाबी भुक्तानी भएको छ भने जीवन तर्फ १ अर्ब ७ करोठ खुद दाबी भुक्तानी भएको छ । अघिल्लो वर्षको तुलनामा निर्जीवन र जीवन दुबै तर्फको खुद दाबी बृद्धि भएको छ ।
समिक्षा अवधिमा कम्पनीको प्रति शेयर आम्दानी ६ रुपैयाँ ८२ पैसा रहेको छ । प्रति शेयर नेटवर्थ १७४ रुपैयाँ ४६ पैसा रहेको छ ।
