काठमाडौं । नेपाल लाइफका सञ्चालक कमलेश कुमार अग्रवाल र विमल प्रसाद ढकालले संस्थागत सुशासन विपरित भत्ता बुझेको पाइएको छ । बीमा समितिले गरेको अनुगमनका क्रममा सञ्चालक कमलेश कुमार अग्रवाल र विमल प्रसाद ढकालले नियम विपरित ८ वटा उपसिमितिको संयोजक बसेर भत्ता बुझेको पाइएको हो । एउटै उपसमितिमा दुई जना संयोजक बसेको समेत पाइएको छ ।
गत आर्थिक वर्ष २०७७/७८ मा सञ्चालक अग्रवालले १३८ वटा मिटिङ बसेर २७ लाख २९ हजार रुपैयाँ बुझेका थिए । उनले अन्य सेवा सुविधा बापत एक लाख ८० हजार रुपैयाँ सहित २८ लाख ९० हजार रुपैयाँ बुझेका थिए । त्यस्तै विमल प्रसाद ढकालले पनि ६९ वटा मिटिङ बसेर १३ लाख ४० हजार र मासिक सेवा सुविधा बापतको एक लाख ८० हजार रुपैयाँ सहित १५ लाख २० हजार रुपैयाँ बुझेका छन् ।
यसरी अस्वभाविक रुपमा भत्ता लिएको समाचार बाहिरिए सँगै बीमा समितिले कम्पनीलाई स्पष्टिकरण सहित कागजपत्र झिकाएको थियो । समितिले मगाएको कागजपत्रमा उनिहरुले संस्थागत सुशासन विपरित भत्ता बुझेको पाइएकोले उनिहरुलाई किन कारबाही नगर्ने भन्दै स्पष्टीकरण सोधिएको समितिका प्रवक्ता राजुरमण पौडेलले जानकारी दिए । समितिको सञ्चालक समितिले कम्पनीलाई संस्थागत सुशासन विपरित काम गरेको देखिएकोले नियम अनुसार १० हजार रुपैयाँ जरिवाना किन नगर्ने भन्दै स्पष्टिकरण सोधेको हो ।
सञ्चार माध्यमले नेपाल लाइफका सञ्चालकले बुझेको भत्ता तथा अन्य सुविधाको विषयमा समाचार मार्फत सार्वजनिक गरिदिएका थिए । सञ्चार माध्यमले समाचार सार्वजनिक गरिदिए सँगै बीमा समितिले कम्पनीलाई स्पष्टिकरण सोध्नुका साथै फाइल मगाएको थियो । सोहि क्रममा उनिहरुले संस्थागत सुशासन विपरित भत्ता बुझेको पाइएको हो । उनिहरुले गैरकानुनी रुपमा लाखौ रुपैयाँ भत्ता बुझे पनि कारबाही भने जम्मा १० हजारको मात्रै हुने भएको छ । कम्पनीले पेश गरेको स्पष्टिकरण चित्त नबुझे समितिले उनिहरुलाई जनही १० हजारका दरले जरिवाना गर्न पाउनेछ ।
नेपाल लाइफ इन्स्योरेन्स कम्पनीका सञ्चालकहरु विना काम भत्ताकै लागि सञ्चालक समितिको बैठक बस्ने गरेको पाइएको छ । कम्पनीका सञ्चालक कमलेश कुमार अग्रवालले मात्रै गत आर्थिक वर्ष २०७७/७८ मा १३८ वटा मिटिङ बसेको देखिएको छ । उनले बैठक भत्ता बापत २७ लाख १० हजार रुपैयाँ बुझेका छन् भने अन्य सेवा सुविधा बापत एक लाख ८० हजार रुपैयाँ सहित २८ लाख ९० हजार रुपैयाँ बुझेको पाइएको छ ।
गत वर्ष दुई सञ्चालक समित अन्य सञ्चालकहरुले पनि अन्य कम्पनीहरुका सञ्चालकले भन्दा धेरै भत्ता बुझ्ने गरेको पाइएको छ । राम अभतार अग्रवाल पनि ५४ वटा मिटिङमा समावेश भएको देखिएको छ । उनले बैठक भत्ता बापत १० लाख २३ हजार र मासिक सेवा सुविधा बापत एक लाख ८० हजार सहित १२ लाख तीन हजार रुपैयाँ बुझेका छन् ।
महिला सञ्चालक पारुल ढकाल पनि ३२ वटा बैठकमा बसेर ६ लाख ३१ हजार बैठक भत्ता र एक लाख ४० हजार अन्य सेवा सुविधा सहित ८ लाख ११ हजार रुपैयाँ बुझेकी छिन् । सञ्चालकहरु मध्ये सबैभन्दा कम पारस मुण्डरा १५ पटक मात्रै बसेको देखिन्छ । उनले २ लाख ७५ हजार भत्ता र एक लाख ४० हजार अन्य सेवा सुविधा सहित ३ लाख ९५ हजार रुपैयाँ बुझेका छन् । विवेक अग्रवाल पनि २४ वटा मिटिङमा समावेश भएको देखिन्छ । उनले मिटिङ भत्ता बापत ४ लाख ७१ हजार र अन्य सेवा सुविधा बापत एक लाख ४० हजार सहित ६ लाख ५१ हजार रुपैयाँ बुझेका छन् ।
अध्यक्ष गोविन्दलाल संघाई भने जम्मा १७ वटा मिटिङमा मात्रै बसेको पाइन्छ । उनले ३ लाख ४४ हजार भत्ता र एक लाख ४० हजार अन्य सेवा सविधा सहित ५ लाख २४ हजार रुपैयाँ मात्रै बुझेको देखिन्छ ।
यो पनि पढ्नुहोस्
भत्ताकै लागि बैठक बस्छन् नेपाल लाइफका सञ्चालक, कमलेश अग्रवाल एक्लैले १३८ मिटिङ बापत बुझे २९ लाख
