काठमाडौं । सरकारले १५ अर्ब ११ करोड रुपैयाँ बढीको आन्तरिक ऋण नवीकरण गर्ने भएको छ।
अर्थ मन्त्रालयअन्तर्गतको सार्वजनिक ऋण व्यवस्थापन कार्यालयले भोलि असार ११ गते जारी हुने १५ अर्ब ११ करोड २५ लाख रुपैयाँबराबरको ट्रेजरी बिल नवीकरण गर्न लागेको हो। कार्यालयले ९१ दिने १० अर्ब ११ करोड २५ लाख रुपैयाँ र ३६४ दिने ५ अर्ब रुपैयाँको ट्रेजरी बिल नवीकरण गर्नेछ।
यी ट्रेजरी बिल क्रमशः असोज ८ गते र २०८२ असार १० गते परिपक्व हुनेछन्। यी ट्रेजरी बिलको बोलकबोल आज दिउँसो ३ बजे हुनेछ।
ट्रेजरी बिल १ वर्ष वा १ वर्षभन्दा कम अवधिको आन्तरिक ऋण उठाउन प्रयोग गरिने अल्पकालीन सरकारी ऋणपत्र हो। सोही प्रयोजनका लागि सार्वजनिक ऋण व्यवस्थापन कार्यालयले ट्रेजरी बिल नवीकरण गर्न लागेको हो।
