काठमाडौं । चालु आर्थिक वर्षको ५ महिना मंसिरसम्म मुलुकको व्यापार घाटा पौने ६ खर्ब रुपैयाँ माथि रहेको छ।
भन्सार विभागले आज सार्वजनिक गरेको तथ्यांकअनुसार यो ५ महिनासम्म मुलुक व्यापार घाटा ५ खर्ब ७९ अर्ब १५ लाख रुपैयाँबराबर रहेको छ। गत वर्ष सोही अवधिसम्म ५ खर्ब ९७ अर्ब ४४ करोड १९ लाख रुपैयाँ बराबरको व्यापार घाटा भएको थियो। व्यापार घाटा पनि ३.०९ प्रतिशतले घटेको छ।
तथ्यांकअनुसार यो ५ महिनामा मुलुक ६ खर्ब ४२ अर्ब २० करोड ८९ लाख रुपैयाँबराबरको वस्तु आयात गरेको हो। गत आर्थिक वर्षको सोही अवधिमा ६ खर्ब ६४ अर्ब ७४ करोड ६४ लाख रुपैयाँबराबरको वस्तु आयात भएको थियो। समीक्षा अवधिमा कुल आयात ३.३९ प्रतिशतले घटेको छ।
यसैगरी यो ५ महिनाको अवधिमा नेपालबाट ६३ अर्ब २० करोड ७४ लाख रुपैयाँबराबरको वस्तु निर्यात भएको छ। जुन गत वर्षको यही अवधिसम्मको तुलनामा ६.०९ प्रतिशतले कम हो। गत वर्षको यही अवधिसम्ममा ६७ अर्ब ३० करोड ४५ लाख २ हजार रुपैयाँ बराबरको निर्यात भएको थियो।
यो ५ महिनामा नेपालको वैदेशिक व्यापार ७ खर्ब ५ अर्ब ४१ करोड ६३ लाख रुपैयाँबराबरको भएको छ। गत वर्ष यही अवधिसम्म ७ खर्ब ३२ अर्ब ५ करोड ९ लाख ५२ हजार रुपैयाँ बराबरको वैदेशिक व्यापार भएको थियो। वैदेशिक व्यापार पनि ३.६४ प्रतिशतले घटेको छ।
