काठमाडौं । भारतमा बचतका लागि जीवन बीमा पोलिसी खरिद गर्ने भारतीय धेरै रहेको पाइएको छ।
पर्फेक्ट प्लान का पार्टनरले हालै गरेको सर्भेक्षण यो नतिजा आएको हो। सर्भेमा सहभागी ५७ प्रतिशत उत्तरदाताले बचतका लागि आफूले जीवन बीमा पोलिसी खरिद गरेको उत्तर दिएका छन्।
त्यस्तै ४४ प्रतिशत उत्तरदाताले परिवारको वित्तीय सुरक्षा र २६ प्रतिशतले छोराछोरीको भविष्यका लागि जीवन बीमा खरिद गरेको बताएका छन्।
भारतमा वित्तीय सुरक्षाका लागि बीमा पोलिसी गर्ने गरेको बलियो आधार भेटिए पनि पोलिसी समीक्षामा अझै धेरै अन्तर रहेको सर्भेका क्रममा भेटिएको छ। सर्भेमा सहभागी केवल ११ प्रतिशत उत्तरदाताले मात्रै आफूहरुले वार्षिक रुपमा पोलिसी समीक्षा गर्ने गरेको बताएका छन्। धेरैजसो उत्तरदाताले भने पोलिसी समीक्षा गर्नुपर्नेमा अनभिज्ञता प्रकट गरे।
सर्भेमा सहभागी ७० प्रतिशत उत्तरदाताले व्यक्तिगत लक्ष्यभन्दा पारिवारिक सुरक्षाप्रति बढी चिन्तित देखिए। करिब दुई तिहाइ (६४ प्रतिशत)ले टर्म इन्स्योरेन्स पोलिसी पहिल्यै नलिएकोमा पछुतो व्यक्त गरे भने २५ प्रतिशत उनीहरुको पोलिसी अनपेक्षित लागत कभर गर्नेमा ढुक्क देखिन्थे। –एजेन्सी
