काठमाडौं । गत आइतबारदेखि कारोबार सुरु भएको प्रभु लाईफ इन्स्योरेन्स कम्पनीको शेयर स्वतन्त्र रुपमा कारोबार हुन सकेको छैन । ब्रोकर कम्पनीहरुको सेटिङ्मा अधिकतम् मूल्यभन्दा निकै तल राखेर पहिलो कारोबार भएपछि उक्त कम्पनीको शेयर स्वतन्त्र रुपमा कारोबार हुन सकेको छैन । खरिदकर्तासँग सेटिङ मिलाएर दैनिक केही थान शेयरहरु कारोबार हुँदै आएको भएपनि स्वतन्त्रमा रुपमा कारोबार नभएको सो कम्पनीको आजको मार्केट डेप्थबाट पुष्टि भएको छ ।
प्रभु लाईफको शेयर किन्नको लागि नेप्सेमा ४१ करोड ९७ लाख ९३ हजार ३६० रुपैयाँ (अहिलेको शेयर मूल्य अनुसार) को २६ लाख ५६ हजार ९२० कित्ता शेयरको आवेदन दिएका छन् भने बिक्रीकर्ता शून्य अर्थात कोही पनि छैनन् । स्वतन्त्र रुपमा कारोबार हुँदा दुवैतिर खरिदकर्ता र बिक्रीकर्ता हुनुपर्नेमा प्रभु लाईफ इन्स्योरेन्सको शेयरमा कारोबार सुरु भएदेखि नै सेटिङमा मात्रै कारोबार हुँदै आएको छ ।
तथ्याङ्क अनुसार प्रतिकित्ता १५८ रुपैयाँमा १३ लाख १४ हजार २०१ कित्ता शेयर किन्नको लागि पाँच हजार ४३० जना लाईनमा बसिरहेका छन् । त्यस्तै सो भन्दा तल मूल्य राखेर समेत शेयर किन्नेको लाईन देखिन्छ । सुरुमा न्यून मूल्य राखेर खरिद बिक्री भएपछि सोही मूल्य कायम भएको प्रभु लाईफ इन्स्योरेन्स कम्पनीको शेयर स्वतन्त्र रुपमा दुवैतर्फ खरिदकर्ता र बिक्रीकर्ता बसेर किनबेच हुन अझै केही समय लाग्ने देखिएको छ ।
नेप्सेमा प्रभु लाईफ इन्स्योरेन्स कम्पनीको ६० लाख कित्ता प्राथमिक शेयर सर्वसाधारणले कारोबार गर्न मिल्ने गरी सूचिकृत छ भने एक करोड ४० लाख कित्ता संस्थापक शेयर सूचिकृत छ ।
