नक्कली बैदेशिक रोजगार म्यादी जीवन बीमा योजना बिक्री गर्ने प्राईम लाईफ इन्स्योरेन्स कम्पनीका अभिकर्ता प्रकाश रेग्मी, कर्मचारीद्धय संजय केसी र सुदिप खड्कालाई पुर्पक्षका लागी थुनामा राख्न आदेश दिएको छ । वल्डवाईज म्यान पावर कम्पनीका सञ्चालक दुर्गा बहादुर घिमिरे काठमाडौ जिल्ला अदालतमा दिएको मुद्धाको थुनछेक बहस पछि अदालतले अन्य तीन जनालाई जमानतमा फुकुवा गर्ने आदेश दिएको छ भने फरार दुई जनाको नाममा पक्राउ पुर्जी जारी गर्ने आदेश दिएको छ ।
त्यसैगरी अदालतले वल्र्डवाईज म्यान पावर कम्पनीका कर्मचारी सिंग बहादुर लामालाई २ लाख धरौटीमा रिहा गर्न आदेश दिएको छ । प्राईम लाईफ इन्स्योरेन्स कम्पनीको ताहाचल कार्यलयका कार्यलय सहायक भोला पोखरेललाई २ लाख र धुव्र रेग्मीलाई २ लाख ५० हजारमा धरौटी फुकवा गर्न आदेश दिएको छ । त्यस्तै, फरार रहेका गिता शर्मा रेग्मी र अमिता दाहालको नाममा पक्राउ पुर्जी जारी गर्न समेत अदालतले आदेश दिएको छ ।
प्राईम लाईफ इन्स्योरेन्सका अभिकर्ता प्रकाश रेग्मी सहित आठ जनाको विरुद्ध ५७५ जनाको व्यक्तिको नाममा नक्कली बीमालेख जारी गरी २२ लाख ३४ हजार रुपैयाँ ठगी गरेको आरोप लागेको छ । वल्डवाईज कम्पनीका सञ्चालक दुर्गा बहादुर घिमिरे सहितले अदालतमा दिएको उजुरी अनुसारी उनीहरुले वल्डवाईज मेनपावर कम्पनीबाट बैदेशिक रोजगारीमा जाने १४० कामदार बापतको ५ लाख १० हजार रुपैयाँ ठगेको आरोप लगाएका छन् । त्यसैगरी सुवास ह्यूमन रिसोर्सबाट बैदेशिक रोजगारीमा जाने ४३४ जनाको १७ लाख २४ हजार रुपैयाँ ठगी गरेको उनले आरोप लगाएका हुन् ।
श्रीमतीको नामबाट नक्क्ली बीमालेख जारी
जिल्ला अदालतलमा अभियुक्तहरुले दिएको बयानको आधारमा थुनामा राख्ने आदेश दिईएको हो । बयानका आधारमा प्रकाश रेग्मीले वल्र्डवाइज म्यान पावर मार्फत बैदेशिक रोजगारीमा जाने १४० जनाको नामबाट नक्कली विमालेख जारी गरेको स्वीकार गरेको अदालतको आदेशमा उल्लेख छ । उनले कम्पनीका कर्मचारीसँग मिली भाई ध्रुव रेग्मी, पत्नी गीता शमाको अभिकर्ता नम्बर राखी नक्कली बिमालेख बनाएको स्वीकार गरेका हुन् । त्यस्तै, वल्र्डवाईज म्यान पावर कम्पनीका कर्मचारी सिंगबहादुर लामाले रेग्मीसँग केही रकम खाएको समेत स्वीकार गरेका छन् । त्यस्तै कम्पनीका कर्मचारी धुव्र रेग्मीको नामको अभिकर्ता नम्बर २६/२०४६९ बाट नक्कली बीमालेख जारी गरेकोे देखिएको अदालतले ठहर गरेको छ ।
