जीवन बीमा कम्पनीहरुले बीमालेख धितोमा राखी २४ अर्ब २९ करोड रुपैयाँ कर्जा प्रदान गरेका छन् । कम्पनीहरुले प्रकाशित गरेको चालु आर्थिक बर्ष २०७५/७६ को दोस्रो त्रैमासको वित्तिय विवरण अनुसार कम्पनीहरुले उक्त रकम बराबर धितो प्रवाह गरेको देखिएको छ ।
जीवन बीमा कम्पनीहरुमध्ये नेपाल लाईफ इन्स्योरेन्स, लाईफ इन्स्योरेन्स कर्पोरेशन र नेशनल लाईफ इन्स्योरेन्स कम्पनीले सबैभन्दा धेरै कर्जा प्रवाह गरेका छन् । नेपाल लाईफ इन्स्योरेन्स कम्पनीले कम्पनीले चालु आवको पुस महिनासम्ममा १० अर्ब १० करोड रुपैयाँ बीमा लेख धितो कर्जा प्रवाह गरेको छ । त्यसैगरी लाईफ इन्स्योरेन्स कर्पोरेशनले ७ अर्ब ८५ करोड रुपैयाँ धितो रकम प्रवाह गरेको छ । नेशनल लाईफ इन्स्योरेन्सले ३ अर्ब १ करोड रुपैयाँ प्रदान गरेको तथ्यांकले देखाएको छ ।
साथै एशियन लाईफ इन्स्योरेन्स कम्पनीले १ अर्ब ६ करोड रुपैयाँ धितो प्रवाह गरेको तथ्यांकले देखाएको छ । सूर्या लाईफ इन्स्योेरेन्सले ३० करोड ४५ लाख रुपैयाँ धितो प्रवाह गरेको छ । सन् नेपालले १ करोड १२ लाख रुपैयाँ, आईएमई लाईफ इन्स्योरेन्सले १ करोड ३५ लाख, मेट लाईफ इन्स्योरेन्सले ८७ करोड १९ लाख रुपैयाँ, , प्राईम लाईफले ७० करोड ४३ लाख, सिटिजन्सले ५७ लाख ९२ हजार, यूनियन लाईफले ७ करोड ८१ लाख रुपैयाँ र गुराँस लाईफ इन्स्योरेन्सले २६ करोड २४ लाख रुपैयाँ कर्जा प्रदान गरेका छन् ।
बीमालेख धितो कर्जा
बीमालेख धितो कर्जा भनेको बीमीतहरुले बीमा कम्पनीहरुबाट खरिद गरेको जीवन बीमालेख धितो राखी लिईने कर्जा हो । बीमा कम्पनीहरुले बीमीतहरुलाई उनीहरुको बीमालेख धितो राखे बापत्त कर्जा प्रदान गर्दछ । यसको लागि बीमीतले कम्तिमा पनि दुई ओटा किस्ता प्रिमियम बुझाएको हुनुपर्नेछ । कर्जा लिदाँ बीमीतले बीमालेखका अतिरिक्त अन्य कुनै धितो वा जमानी राख्नुपर्दैन ।
कर्जा लिने प्रक्रिया
कम्पनीहरुले बीमा समितिको निर्देशन अनुसार बीमालेख धितो बापत कर्जा लगानी गर्दै आईरहेका छन् । यस्तो कर्जा बीमा योजनाको प्रकृति अनुसार फरक फरक हुने गर्छ । साधारणतया बीमा कम्पनीहरुले कर्जा वितरण गर्दा बीमीतहरुले बीमा कम्पनीमा भुक्तानी गरेको रकमको आधारमा गर्दछन् । बीमा समितिले तोकेको नियम अनुसार बीमीतले भुक्तानी गरेको रकमको सर्मपण मूल्याङकन गरिन्छ । सोही मूल्याङकन पछिको रकमको अधिकत्तम ९० प्रतिशतसम्म कम्पनीहरुले कर्जा दिन्छन् । यस्तो कर्जाको ब्याजदर पनि योजना अनुसार नै हुने एशियन लाइफ इन्स्योरेन्स कम्पनीका काम उपप्रबन्धक सुनिल बज्राचार्यले बताए । उनले भने ‘हामीले साधारणतया ११ प्रतिशत ब्याजदरमा कर्जा प्रवाह गरिरहेका छौं ।’ नेपाल लाइफ इन्स्योरेन्स कम्पनीले भने १० प्रतिशत ब्याजदरमा कर्जा प्रवाह गर्दै आएको छ । यस्तो कर्जाको अवधिमा बीमा अवधि बराबर हुन्छ ।
