काठमाडौं ।एशियाली मुलुक चीनको जीवन बीमा बजार अबको ५ वर्षमा ८ खर्ब ९० अर्ब अमेरिकी डलरभन्दा माथि पुग्ने प्रक्षेपण गरिएको छ। चिनियाँ जीवन बीमा उद्योग बारे हालै गरिएको अध्ययनका क्रममा सन् २०२४ देखि २०२८ सम्ममा वार्षिक ९ प्रतिशत चक्रवृद्धि दरले सन् २०२८ सम्ममा ८ खर्ब ९० अर्ब अमेरिकी डलर बराबर पुग्ने प्रक्षेपण गरिएको हो ।
ग्लोबलडाटाका अनुसार चीनको जीवन बीमा कारोबार सन् २०२४ मा ५ खर्ब ५२ अर्ब अमेरिकी डलर रहने अनुमान गरिएको छ। ग्लोबलडाटाको बीमा तथ्यांकका अनुसार चीनको जीवन बीमा उद्योग सन् २०२४ मा ९.६ प्रतिशतले वृद्धि हुने अनुमान गरिएको छ। अर्थतन्त्रमा सुधार, अनुकूल नियामक प्रबन्धन र कोभिड-१९ महामारी पछि स्वास्थ्य र वित्तीय योजनाको बढ्दो चेतनाले प्रक्षेपित वृद्धिदरलाई समर्थन गर्ने अपेक्षा गरिएको छ।
चीनियाँ उपभोक्ताबीच आजीवन बीमा योजना सर्वाधिक लोकप्रिय छ। चीनको जीवन बीमा कारोबारको ७८.३ प्रतिशत हिस्सा आजीवन बीमा योजनाले ओगटेको छ। यसैगरी व्यक्तिगत स्वास्थ्य तथा दुर्घटना बीमालेखको हिस्सा २१.४ प्रतिशत रहेको छ।
