काठमाडौं । एकर्ड फर्मास्युटिकल्स लिमिटेडले प्राथमिक शेयर(आइपीओ) निष्काशन गर्ने भएको छ । कम्पनीले आफ्नो जारी पूँजीको १२ प्रतिशतले हुन आउने १ सय रुपैयाँ अंकित दरको ७ करोड ६ लाख ९० हजार ९०० रुपैयाँ बराबरको ७ लाख ६ हजार ९०९ कित्ता आइपीओ निष्काशन गर्न लागेको हो ।
आइपीओ निष्काशनका लागि आवश्यक पूर्व तयारी शुरु गरेको कम्पनीले हालै मात्र प्रत्याभूतिकर्ताको रुपमा एनआइबिएल एस क्यापिटललाई नियुक्त गर्ने सम्झौतामा हस्ताक्षर गरेको छ ।
सम्झौतामा कम्पनीका तर्फबाट प्रबन्धक निर्देशक बिशाल पण्डित तथा एनआईबिएल एस क्यापिटल लिमिटेडका तर्फबाट नायब महाप्रबन्धक सचिन्द्र ढुङ्गानाले हस्ताक्षर गरेका छन्।
सन् २०१३मा एकर्ड फर्मास्युटिकल्स लिमिटेड औषधि उत्पादन गर्ने उद्योगका रुपमा दर्ता भएको कम्पनी हो । कम्पनीले व्यावसायिक उत्पादन भने सन् २०२१ फेब्रुअरीदेखि गरेको थियो । कम्पनीको रजिष्टर्ड कार्यालय काठमाडौंको सुबिधानगरस्थित तीनकुनेमा छ ।
