काठमाडौं । विगत लामो समयदेखि इन्स्योरेन्स क्षेत्रमा आवद्ध अनल गौतमको दुई कृति प्रकाशनमा आएको छ । एनएलजी इन्स्योरेन्स कम्पनीमा दाबि विभाग प्रमुखको रुपमा कार्यरत गौतमले ‘दाहिने हाते सिक्का र साइकल’ कथा संग्रह र ‘बार्दली’ उपन्यास प्रकाशनमा ल्याएका हुन् । प्रकाशनमा आएका यी दुई पुस्तक कथा संग्रह र उपन्यास पाँचौ र छैटौं कृति हुन् ।
गौतमले प्रकाशनमा ल्याएको ‘दाहिने हाते सिक्का र साइकल’ कथा संग्रहमा कुल ११ वटा कथाहरु रहेको गौतमको भनाई छ । जुन युवा पुस्ताको मनोविज्ञान, बाल्यवस्थाको मनोविज्ञान साथै सामाजिक विषयमा आधारित रहेको उनले बताए । यसैगरी ‘बार्दली’ उपन्यास भने यसअघि प्रकाशनमा आएको ‘लव एट २५’ को दोस्रो भाग रहेको लेखक गौतमको भनाई छ । ‘बार्दली’ भने आधुनिक समाजका युवाले गर्नुपरेको संघर्ष बारे लेखिएको उपन्यास हो ।
२०६४ सालबाट सुरु भएको साहित्य यात्रा
जागिरे जीवनसँगै साहित्य यात्रालाई अंगालेका गौतमले पहिलो पल्ट २०६४ सालमा ‘शुभप्रभात’ शिर्षकमा हाइकु प्रकाशनमा ल्याएका थिए । यसैगरी २०६८ मा ‘चिनारी’ कविता संग्रह प्रकाशन भएको थियो भने २०७० सालमा कथोपन्यास ‘घाट घाटका कथा’ प्रकाशनमा आएको थियो । यी नै कृति मार्फत साहित्य क्षेत्रमा अब्बल बनेका हुन् लेखक गौतम । साहित्य क्षेत्रमा आफूलाई थप सशक्त बनाउने क्रममा गौतमले २०७४ सालमा ‘लव एट २५’ नामक उपन्यास सार्वजनिक गरेका थिए । एक संघर्षशिल युवाको जीवनमा आइपर्ने उत्तारचढाबलाई सरल ढंगले पस्केका छन् उनले । ‘लव एट २५’ उपन्यासको दोस्रो भाग अर्थात अन्तिम भागको रुपमा ‘बार्दली’ उपन्यास प्रकाशनमा ल्याएका हुन् । जुन बार्दलीबाट सुरु भएको उपन्यास बार्दलीमै अन्त्य हुने लेखकको भनाई छ ।
१६ वर्षदेखि बीमा क्षेत्रमा आवद्ध गौतम
साहित्यकारको रुपमा चिरपरिचित अनल गौतम बीमा क्षेत्रमा समेत उस्तै अव्वल व्यक्ति हुन् । उनी विगत १६ वर्षदेखि बीमा क्षेत्रमा आवद्ध छन् । उनी पहिलोपल्ट २०६४ सालमा लुम्बिनि जनरल इन्स्योरेन्समा अधिकृतको रुपमा प्रवेश गरेका थिए । लुम्बिनिबाट सुरु भएको यात्रा एभरेष्ट इन्स्योरेन्स कम्पनी हुँदै एनएलजी इन्स्योरेन्ससम्म आइपुगेको हो । विगत ८ वर्षदेखि भने उनी एनएलजी इन्स्योरेन्समा आवद्ध छन् । उनी एनएलजीमा दाबि विभाग प्रमुखको रुपमा रहेका छन् ।
उनी इन्स्योरेन्स क्षेत्रमा संलग्न हुनुभन्दा अगाडी भने व्यवसायीको रुपमा रहेका थिए । एसएलसी सकिए लगत्तै विभिन्न क्षेत्रमा व्यवसायको अनुभव बटुलेका उनले जीवनको करिब २६ वर्ष यसरी नै वित्यो ।
उनी बीमा क्षेत्रमा संलग्न हुँदै गर्दा नेपाली बीमा क्षेत्र भने निक्कै जटिल अवस्थामा रहेको उनी सुनाउँछन् । उक्त समय बीमा गर्न योग्य सम्पत्तिको समेत बीमा नभएको उनको भनाई छ । बैंकिङ सम्पत्तिमा समेत जबरजस्ती बीमा गर्नुपर्ने अवस्था थियो । गाउँगाउँमा बीमा बारे कुनै जानकारी नै थिएन भने बीमा गर्ने क्लाइन्ट भेट्टाउन निक्कै मुस्किल थियो ।
२०७२ सालको महाभुकम्पपछि भने नेपालीहरुमा बीमा गर्नुपर्छ भन्ने चेत बढ्दै गएको उनको अनुभव छ । साथै बीमा गर्न योग्य सम्पत्ति पनि दिनानुदिन बढ्दै गएको उनी सुनाउँछन् ।
