काठमाडौं । आरएमडिसी लघुवित्त वित्तीय संस्थाको मुनाफामा उल्लेख्य बृद्धि भएको छ । चालु आर्थिक वर्षको पहिलो त्रैमाशिक अवधिमा संस्थाले गत वर्षको यहि अवधिको तुलनामा ४.३६ गुणाले बढाउन सफल भएको हो ।
असोज मसान्तसम्ममा संस्थाले २६ करोड ४२ लाख रुपैयाँ मुनाफा आर्जन गरेको छ । गत वर्षको यहि अवधिमा संस्थाले ६ करोड ५ लाख रुपैयाँ मुनाफा आर्जन गरेको थियो । मुनाफामा सुधारसँगै संस्थाको प्रतिशेयर आम्दानी पनि १०१ रुपैयाँ पुगेको छ ।
पहिलो त्रैमाशिक अवधिमा संस्थाले खुद व्याज आम्दानी मात्रै १२ करोड १७ लाख रुपैयाँ आर्जन गरेको छ । जवकी गत वर्षको यहि अवधिमा १० करोड १८ लाख रुपैयाँ थियो । संस्थाले शेयर बजार लगायत ‘नन अपरेटिङ इनकम’बाट मात्रै ३० करोड ९८ लाख रुपैयाँ आम्दानी गरेको छ । यहि आम्दानीले संस्थाको मुनाफामा उल्लेख सुधार भएको हो ।
संस्थाको चुक्ता पूँजी एक अर्ब तीन करोड रुपैयाँ रहेको छ भने जगेडा कोषमा दुई अर्ब एक करोड रुपैयाँ रहेको छ ।
