काठमाडौं। अन्तर्राष्ट्रिय पूनर्बीमा कम्पनी स्विस रि अन्तर्गतको अनुसन्धान संस्था स्वीस रि इन्स्टिच्युटले गरेको अनुसन्धानमा अनलाइनमार्फत गरिने व्यक्तिगत सम्पत्ति बीमा दक्षिण एशिया र दक्षिण पूर्वी एशियामा आगामी पाँच वर्षभित्र साढे सात अर्ब अमेरिकी डलर अर्थात् ९ खर्ब ४ अर्ब रुपैयाँ पुग्ने अनुमान गरिएको छ।
स्वीस रिले दक्षिण र दक्षिणपूर्वी एशियाको निजी सम्पत्ति बिमा (घर, व्यक्तिगत दुर्घटना र रोजगारी) लाई अनलाइनमार्फत खरिद गर्ने इच्छा सम्बन्धमा गरेको सर्वेक्षणको परिणाम प्रकाशित गरेको हो।
पहिलो पटक गरिएको यो अनुसन्धानमा दक्षिण र दक्षिण पूर्व एशियामा व्यक्तिगत सम्पत्ति बीमामा अनलाइन माध्यम अपनाउन इच्छुक ५६०० जनाबीच सर्वेक्षण गरिएको हो। सर्वेक्षणमा भारत, सिंगापुर, मलेशिया, इन्डोनेशिया, थाईल्याण्ड र भियतनामका सर्वसाधारणको सहभागिता रहेको स्वीस रिले जारी गरेको प्रतिवेदनमा उल्लेख छ।
