काठमाडौं । चमत्कारी ‘सुपर जायन्ट’ खोजले दक्षिण अफ्रिकालाई उछिन्ने तयारीमा चीन रहेको छ। चीनको हुनान प्रान्तस्थित वाङ्गु गोल्ड फिल्डमा भूगर्भविद्हरुले विश्वको सबैभन्दा ठूलो मानिएको सुनको भण्डार पत्ता लगाएका हुन्।
प्रारम्भिक अनुसन्धान र थ्रीडी मोडलिङका आधारमा यो ‘सुपर जायन्ट’ निक्षेपमा १ हजार १०० मेट्रिकटनसम्म सुन रहेको अनुमान गरिएको छ। जसको बजारमूल्य ८३ अर्ब अमेरिकी डलरभन्दा बढी हुन सक्छ। यो विशाल खोजले हाल विश्वकै सबैभन्दा ठूलो मानिएको दक्षिण अफ्रिकाको ‘साउथ डिप माइन’लाई पछि पार्न सक्ने सम्भावना बढेको छ।
उत्कृष्ट गुणस्तरको सुनको खानी
हुनान भूगर्भ ब्युरोका अधिकारीहरुका अनुसार यो भण्डारको सबैभन्दा ठूलो विशेषता यसको उत्कृष्ट गुणस्तर हो। परीक्षण गरिएका कोर नमुनाहरुमा प्रतिमेट्रिकटन अयस्कमा १३८ ग्रामसम्म सुन भेटिएको छ। यो दर सामान्यतया उच्च मानिने (८ ग्राम प्रतिमेट्रिकटन) भन्दा कैयौँ गुणा बढी हो।
सुरुमा २ हजार मिटर गहिराइमा करिब ३०० टन सुन पुष्टि भएकोमा उन्नत थ्रीडी मोडलिङले यो भण्डार ३ हजार मिटरसम्म फैलिएको र कुल मात्रा १ हजार १०० टन पुग्न सक्ने देखाएको छ। खानीको यो विशाल भण्डार ४० भन्दा बढी सुनका शिराहरु मा फैलिएको छ।
विश्व बजारमा तत्कालको प्रभाव
यो विशाल सुनको भण्डार फेला परेको खबर सार्वजनिक भएलगत्तै विश्वव्यापी सुन बजारमा ठूलो हलचल आएको छ। बजारमा सम्भावित आपूर्ति वृद्धि हुने अपेक्षाका बाबजुद तत्कालका लागि सुनको मूल्य प्रतिऔँस ३ हजार ९५७ अमेरिकी डलरसम्म पुगेको छ।
चीन पहिलेदेखि नै विश्वको सबैभन्दा ठूलो सुन उत्पादक राष्ट्र हो। यो नयाँ खोजले आयातित सुनमाथिको उसको निर्भरता घटाउने र विश्व सुन आपूर्तिको चेनमा उसको नियन्त्रण थप मजबुत बनाउनेछ।
आगामी चुनौती
वाङ्गु गोल्ड फिल्डको यो ‘सुपर जायन्ट’ सुनको खानी चीनको अर्थतन्त्र र विश्व कमोडिटी बजारका लागि एउटा नयाँ युगको सुरुवात हो। यद्यपि, ३ हजार मिटरको अत्यधिक गहिराइमा खानी उत्खनन गर्नु प्राविधिक रुपमा चुनौतीपूर्ण र महँगो हुनेछ। भूगर्भविद्हरुले अहिले यसको पूर्ण आर्थिक र वातावरणीय प्रभावको अध्ययन गरिरहेका छन्।
यो निवेशका लागि ठूलो सम्भावना बोकेको खोजले आगामी वर्षहरुमा बीमा कम्पनीहरु र सुनमा आधारित निवेश योजनाहरुलाई समेत प्रभावित गर्ने निश्चित छ।
